Mizo Idol star Mami music video hmasa ber zaninah

Mizo Idol hnuhnung ber, kum 2018-a neiha che ṭha tak, pahnihna hial ni thei H Lalnunsiami (Mami) chuan zanin hian a official music video hmasa ber 'I thawk zel ang u' chu a YouTube channel 'Mami Hnamte'-ah a tichhuak dawn.

Mami hian a music video thar hi Zonet lamah chuan a tichhuak tawh a, TV en hman lo tan zanin dar 8 aṭang hi chuan YouTube lamah duh hun hunah thlirin a ngaihthlak theih tawh dawn a ni.

He hla hi VL Nghaka Renthlei phuah a ni a, rawngbawl tura insawmna hla ṭha tak a ni. "He hla 'I thawk zel ang u' tih hla hi Chanchinṭha puan darh kawnga ṭhahnemngai tura fuihna leh chona hla a ni ber.

"He ram chhunga kan bul hnaih maia Kristian ni lem lo, Lal Isua hre reng reng lote hi enliam mai loa, an tana ṭhahnemngai taka Chanchinṭha kan hrilh a, suala tlu mekte pawh Lal Isua tana ke pe ve tura sawmna hla a ni," tiin a phuahtu Nghaka chuan a hla chungchang hi Vanglaini a hrilh.

Mami hian Mizo Idol 2018-ah che ṭha viauin, pahnihna hial ni mah se zirna lama insawrbing a duh avangin music video a tichhuak lawk thei lo a, kum thum lai hnuah a rawn tihchuak ve ta chauh a ni.