Mizo Dance Drama Series ‘Z Academy’ YouTube-ah

Mizo Dance Camp siam Mizo dance drama series hmasa ber ‘Z Academy’ chu YouTube lamah en theihin a awm ta.

‘Z Academy’ hi ṭhenkhat chuan a trailer kan hmu tawhin a rinawm a, tunah chuan YouTube lamah, Alan Rinawma Channel ah en theihin a awm tawh a ni.

He series hi Zirtawpni zanah episode thar a chhuak ṭhin dawn a, he dance drama series kaltlang hian Mizo ṭhalai lam thiam tak takte chanchin leh hlawhtling tura an beih chhoh dan leh an harsatna tawhte tarlan a ni ṭhin dawn.

Dance scene hmuhnawm tak tak en tur a awm ṭhin dawn a, episode hmasa ber pawh a hmuhnawm viau. Dance scene atan hian Mizo hla nalh tak tak an rawn hmang ṭhin dawn a, Alan Rinawma direct leh choreograph niin, dance scene hi Moonshine Studio lak a ni thung.

Episode 1 chu October 1, Zirtawpni liam ta zan dar 7 khan dah chhuah niin, he episode-ah hian JT Production leh Ben Opa hla thar ‘Lungtiawii’ tih chu rawn pho chhuah nghal a ni. Feli Fanai hla ‘Chhingmittui a hul zo ta’ tih hla hmanga thiam taka an lam hmuh tur a awm bawk. YouTube lamah man chawi loin he series hi a en theih reng tawh a ni.