Box Office ; Tlangzarh kara sum lalut hnem ber record siamtu Avengers: Infinity War

2nd May, 2018

Marvel Comics behchhana siam superhero film 'Avengers: Infinity War' chu kar kal ta Zirtawpni khan tlangzarh a ni ta a, sum lakluh tam lamah record a siam nghal!

Infinity War hian US-ah ringawt $mtd 258 zet lalutin, tlangzarh kara sum hailut hnem ber record a siam. Box Office-ah roreltu a ni mek bawk.

Avengers: Infinity War hian Box Office aṭangin $mtd 258 zet a lalut a, Star Wars: The Force Awakens record lo siam tawh chu a khum. Star Wars hian kum 2015 khan tlangzarh karah $mtd 248 lalutin, sum hailut hnem ber nihna a lo hauh tawh a ni. He record duhawm tak hi Infinity War hian a rawn khum a, Star Wars team pawhin lawmpuina an hlan hial.

Hetih rual hian Star Wars: The Last Jedi chu tlangzarh kara sum thawkchhuak hnem pathumna niin, $mtd 220 lai a thawk chhuak ve bawk.

Avengers: Infinity War hian khawvel hmun hrang hrang

aṭangin $mtd 640.9 zet a lalut tawh a, 'The Fate of the Furious' sum lakluh zat $mtd 541 chu a khum a ni. Tlangzarh aṭangin kar khat pawh a la liam loh avangin record dang pawh a siam belh a rinawm. Kar khat chhungin khawvel hmun hrang hrang aṭangin $tld 1.8 vel zet a lakluh theih beisei a ni.

Infinity War hian record duhawm tak a siam a, South Korea, Brazil, Philippines, Thailand, Indonesia, Malaysia, Hong Kong, Vietnam, Central America, Chile, Peru, Bolivia leh United Arab Emirates-ahte tlangzarh nia sum hailut hnem ber a ni bawk.

Avengers: Infinity War-ah hian American actor Robert Downey Jr. chu Iron Man lemah a chang a, Chadwick Boseman chu Black Panther-ah a chang. Australian actor Chris Hemsworth chu Thor lemah a chang a, Chris Evans chu Captain America a ni thung. Mark Ruffalo chu Hulk niin, American actress Scarlett Johansson chu Black Widow lemah a chang bawk. Hollywood super star rual channa hi tunlai movie chhuak thar zingah chuan ngaihven hlawh ber a ni mek.

Box Office-a sum lalut tam pahnina chu A Quiet Place niin, $mtd 11 a lalut. Sum lalut hnem zingah hian Dwayne 'The Rock' Johnson channa Rampage a lang a, Black Panther leh Ready Player One te pawh an lang leh bawk.