Mystical Mizoram Ṭhazual Gospel ; Chart hmahruaitu Melody Lalzirliani
Mystical Mizoram Ṭhazual Gospel chart-ah Melody Lalzirliani chu pakhatna a ni a, a hla 'Ka tan a tawk reng si' chu pakhatna a nihpui.
Palina aṭangin No.1-ah Melody
Chart hmasaah khan 'Ka tan a tawk reng si' hi palina a ni a, tunah erawh pakhatnaah a rawn zuang dawrh a ni.
He hla hi Fela, Dutlang Leitlan hlate dahkhawmna 'Pathian Hmangaihna' album-a mi kha niin Melody hian a sawi mawi hle a, music video hmuh a nuam bawk nen, pakhatna a rawn ni hi a awm hle a ni. 'Ka tan a tawk reng si' hi MDM lama Melody hla hmasa ber a ni a, Ṭhazual chart-a a hla lanpui hmasa ber ni bawkin, MDM-a a hla hmasa ber chu chart topper a rawn nihpui nghal a ni.
Youth Icon star Melody hian July thla tawp lamah khan he hla hi a tichhuak a, chart topper a ni har lo hle. Chart leh lamah pakhatna a la ni thei dawn em tih chu hriat a chakawm tawh viau mai.
Pahnihna Arini, pathumna Cindy
Arini chuan 'A nung ka hria' chu pahnihna a nihpui a, he hla hi chart hmasa lamah khan pangana niin hma a sawn chak hle.
Pathumna chu Cindy hla 'I awm vangin' kha ni bawkin ani pawh hi parukna aṭangin top 3-ah a rawn inhlangkai a ni. Tunṭum Ṭhazual chart top 3-a hlate hi Pathian Hmangaihna' album-a mi vek an ni leh a, he album-a hlate hi a hit viau a ni.
Chart-a lang dangte chu
Angaihteii Hnialum 'Ka duh che' chu palina niin One in Christ chuan 'Fak che ka nuam' hmangin top 5 an khar.
Chart-ah hian Vanlalrohlui, Sailo Lalsangzuali, Sawmtea Chhangte, PC Vanlalhriati leh Bee31-te pawh an lang a ni.