Newsboys album thar 'Stand'

Christian rock band lar Newsboys chuan Zirtawpni liam ta khan album thar 'Stand' an tlangzarh.

'Stand' hi an studio album 19-na a ni tawh a, tuna an vocalist, DC Talk star Michael Tait-a'n an band a zawm hnua an studio album pasarihna a ni thung.

Newsboys album thar hi streaming platform hrang hrangah ngaihthlak tur awm tawh a, kumin an hla single-a an tihchhuah tawh 'I Still Believe You Are Good', 'Clean' leh 'Ain't It Like Jesus'-te pawh khan he album-a mi vek hi niin he album-ah hian hla 10 a awm a ni.

"Kum khat chuang vel chu inah tawmin ka rimawi siam duh zawng ngun taka ngaihtuahin hla ka phuah a, studio-ah ka lut bawk a, chu project chu STAND hi a lo ni ta a ni. Kan hun tawn mek behchhanin record kan siam duh tih ka hria a, chutiang chiah chu kan siam ta a ni," tiin hripui leng kara an album tihchhuah chu khawvel hun tawn mek nen pawha inhmeh tak a nih thu Michael Tait chuan a sawi.

Newsboys hi kum 1985 daih tawha indin kha niin Queensland, Australia aṭanga indin an ni a, Christian band-ah chuan hlawhtling ber zinga mi an ni. Album an tihchhuah tawh zinga paruk lai chu gold certify an ni tawh hial a, ram hrang hrangah album copy maktaduai 10 chuang an hralh tawh.

Grammy award-ah pawh vawi li lai nominee an ni tawh a, Dove Awards phei chu an dawng hnem tawh hle. 'God's Not Dead' film series-ah an la inlan vek a, vawiina tlangzarh tur 'God's Not Dead: We the People'-ah pawh hian an inlan leh maithei a ni.

STAND album-a hla awmte:-
1 Magnetic
2 Ain’t It Like Jesus
3 I Still Believe You Are Good
4 Clean
5 Stand
6 Blessings On Blessings
7 Come Through
8 No Doubt
9 Never Too Far Away
10 Won’t Be Afraid