Simeikhu lian takin kan solar system a rawn pan mek

Van lam chanchin zir mite chuan Simeikhu lian tak, Simeikhu an hmuh tawha la lian ber pawl chuan kan solar system a rawn pan mek tih an hmu chhuak.

He Simeikhu hi kumin June thla khan hmuh chhuah a ni a, a hmingah Bernardinelli-Bernstein (BB) tih phuahin tun aṭanga kum 10 hnu, kum 2031 velah hian kan 'Ni' bul a thlen an ring.

US-a hmunpui nei (National Optical-Infrared Astronomy Research Laboratory) NOIRLab chuan June thla khan hemi chungchangah hian report tichhuakin, kan Solar System lam rawn pan mektu Simeikhu hian orbit sei tak a nei tih an tarlang a, kum maktaduai tam tak liam tawh aṭang khan a zinkawng a rawn ṭan niin an tarlang bawk.

He Simeikhu hi a hmu chhuaktu pahnih - Pedro Bernardinelli leh Gary Bernstein-te hmingchawiin Bernardinelli-Bernstein an ti a, tunah hi chuan Khawvel leh Ni inkar hlat zawng ang let 29 vel zeta hlaa awm Oort cloud-ah a la awm mek a, a awmna hlat zawng hi 29 astronomical units (AU) tiin an sawi ṭhin a ni.

Amaherawhchu, he Simeikhu hi khawvel tan erawh a hlauhawm pha dawn lo niin mithiamte chuan an sawi a, Saturn leh Uranus inkarah kan Solar System a rawn pel dawn niin an chhut.

Bernardinelli-Bernstein hi km 100 vel zeta sei a ni a, chumi awmzia chu Simeikhu tlanglawn aiin a let sang khat velin a sei zawk tihna a ni. A len em avang hian astronomer-te chuan a tirah phei chuan 'dwarf planet' emaw an ti hial.

'Live Science'-a tarlan a nih dan chuan he Simeikhu khi kan Khawvel aṭang hi chuan mit lawngin a hmuh theih dawn loha, telescope hmang chauhin a hmuh theih dawn thung.

Mithiamte chuan BB hian kum maktaduai 3.5 vel liam taah khan he kan Solar System hi a lo chhun pel tawh niin an ngai.