Coldplay leh Selena Gomez an thawkdun

Kar liam ta lawka BTS nena thawkdun Coldplay chuan tunah hian Selena Gomez an thawhpui leh tawh tih thawm a awm a, British rock band hian American singer hi thawhpuiin hla thar an tichhuak thuai dawn niin a lang.

Khawthlang media-te tarlan dan chuan Chris Martin leh a ṭhiante hian kum 29 mi Selena hi hla thar 'Let Somebody Go'-ah an thawhpui a, chu hla chu October 15-a an album thar 'Music Of The Spheres' an tlangzarh hma ngeiin an tichhuak dawn niin an sawi bawk.

The Sun chanchinbu Bizarre column-ah chuan,"Chris hi Selena fan a ni reng a, Coldplay record-a a zai tur hi Chris-a duhthusam hlawhtlinna tur a ni.

Selena tan hian ballad mawi tak a ziak a, April thla khan an record dun tawh nghe nghe a ni," tiin an ziak.

Coldplay hian October 15 hian an studio album pakuana tur 'Music Of The Spheres' hi tlangzarh an tum a, track list pawh tichhuak tawhin list-ah chuan 'Let Somebody Go' pawh hi a awm ngei a, mahse chutah chuan Selena hming hi ziah lan a ni lo thung. Amaherawhchu he hla hi an lo siam ho reng a nih hmel.

'Music Of The Spheres'-a hla pahnih 'Higher Power' leh BTS an thawpuina 'My Universe'-te chu single-in an lo tichhuak tawh a, 'Let Somebody Go' hi khawthlang media-te tarlan anga an tichhuak a nih chuan an album thar tur aṭanga an single palina tur a ni ang.