ABBA an intuai thar leh dawn

Swedish pop group ABBA chu tour nei turin an inbuatsaih mek a, hla thar pawh an tichhuak hnai niin khawthlang media-te chuan an tarlang.

Khawvel mipuite an zuna uaitir thei khawpa zai thiam - Agnetha Fältskog, Björn Ulvaeus, Benny Andersson leh Anni-Frid Lyngstad te hian intuai thar leh a, mipui hmaa inlan leh an tum a ni.

Tun hnai khan hla thar tihchhuah an tum thu an lo puang tawh a, mahse an tichhuak ngei ang em tih an la sawi ngam lo thung. Group member Benny chuan, "Track pahnih tihchhuah kan rilruk a, mahse a fuh dawn nge dawn lo kan hre lo" a ti.

Benny chuan studio an luhchilh leh dawn leh dawn loh a la chiang lo tih a sawi rualin, tour neih leh neih loh thu pawh an la ngaihtuh leh tur thu a sawi. Hetih rual hian hla thar chu an tihchhuah ngei a beisei thu sawiin, "Eng nge thleng dawn a hriat thuai ang," a ti bawk.

Bjorn pwhin an hla thar tur hi sawi langin, pakhat zawk chu tun hnaia an phuah niin, a dang leh chu kum 1972 daih tawha an phuah a ni thung. An hla thar hi an buaipui mek a, an la peihfel chiah lo a ni.

Engpawh nise 'Mamma Mia' singer-ten thawm an rawn nei leh ta hi chanchin lawmawm a ni a, fan-te pawh an phur tawh hle. ABBA hian kum 1981-a 'The Visitors' an tichhuah bak kha studio album pangai an la tichhuak leh lo a ni.