National Film Award 2018 Thih hnua chawimawia awm Sridevi

India rama film lama chawi­mawina sang National Film Award chu Ningani khan Vigyan Bhawan, New Delhi-ah sem a ni leh ta. Kumin February 24-a boral Bollywood super star Sridevi chu Best Actress atan thlan a ni.

Sridevi hi nikuma tihchhuah crime film 'MOM' avangin award hi hlan a ni a, a thih hnuah chawimawiin a awm. Award hi a farnu Janhvi Kapoor, Khushi leh a pasal Boney Kapoor ten an dawn sak a ni. Sridevi hi National Award-ah hian chawimawiin a awm a, sawizui hlawh ber pawh a ni.

Janhvi Kapoor chuan, "Sridevi hnena award hlan a ni hi kan lawm a, kan chhungkua pawh kan hlim hle a ni. Hetih rual hian amah a awm ta lo hi pawi kan ti a, kan rilruah a thar hle a ni" a ti. National Film Award sem a nih theih nana hma latu sorkar laipui leh I&B Ministry chungah pawh lawmthu a sawi bawk.

Sridevi-i'n Chandni film-a a lo chanpui tawh Vinod Khan­na pawh, India rama film lama chawimawina sang ber Dad­asaheb Phalke Award hlan a ni bawk. Vinod Khanna pawh hi nikum khan a boral a, a thih hnuah chawimawina sang hlan a ni. Award hi a fapa actor Akshaye Khanna chuan a dawn sak a ni. Akshaye Khanna pawh hi MOM film-a Sri­devi nena chang dun tho an ni.

Mimal chawimawina
Nagar Kirtan star Ridhhi Sen chu Best Actor atan thlan a ni. Kum 19 mi lek Riddhi Sen hi Bengali actor niin, Bollywood star rual zinga award dawng thei a nih avangin a chanchin hi mite ngaihven ber pakhat a ni mek.

Indian filmmaker lar Jayaraj chuan Best Director award a dawng. A ni hian film eng emaw zat a lo siam tawh a, Bhayana­kam avangin he award hi hlan a ni. Best Supporting Actress atan Irada star Divya Dutta chu thlan a ni bawk. Heng bakah hian mimal chawimawina dawng eng emaw zat an awm a, Special Mention Award sem a ni bawk.

Ṭawng hrang hranga film tihchhuah 11 zet hnenah award hlan a ni bawk. Best Hindi Film atan Newton thlan niin, Best Bengali Film chu Mayurakshi a ni. Kum 1989-a tihchhuah Ishu chu Best Assamese Film atan thlan a ni bawk. National Film Award-ah hian Baahubali chu a langar hle a ni.

Village Rockstars
Assamese film lar 'Village Rockstars' chuan National Award for Best Film leh Best Editing award a dawnga, a langsar viau.

Rockstars film hi filmmaker lar Rima Das kutchhuak niin, Toronto International Film Festival 2017-ah pawh khan chhuah a lo ni tawh. Hei bakah hian Shadi Abd El Salam Prize for Best Film-ah award dawng thei tura chawp­chhuah zingah a tel pha bawk.

Village Rockstars hi Assa­mese film chhuak tawh zingah chuan hlut hlawh ber pawl a ni a, India ram mai ni lo, khavel hmun dang thlenga hriat hlawh a ni.

Sawiselna chu
National Award semna hunah hian India president Ram Nath Kovind chu tel tur leh, award sem tura ruat a ni. Mahse president hian mi 11 hnenah chauh award a sem a, ceremony a awm tluan loh avangin award dawngtute an lungawi lo hle.

He thil hi award sem a nih hma hauh aṭangin sawiselna a tam hle a, president-in ceremony a awm tluanpui dawn lo tih an hriat avang hian an lungawi lo hle a ni. Award dawng hian mi 137 zet thlan chhuah an ni a, chung zinga 50 zet chu an inlan lo. Award pathum zet dawngtu film director Praveen Morchhale pawh lungawi lo zingah hian a tel a ni.

65th National Award semna hun hi India president Ram Nath Kovind chuan hmanpuiin, mi 11 hnenah award a hlan a ni. A dang zawng hi chu - Information and Broadcasting (I&B) Minister Smriti Irani, Minister of State, I&B, Rajyavardhan Singh Rathore leh I&B Secretary Narendra Kumar Sinha ten an hlan a ni.