'Venom: Let There Be Carnage' a bengchheng

Box Office-ah 'Shang-Chi' in kar eng emaw zat ro a rel hnuah ngam loh a tawng ta. Chu chu tudang ni loin Venom 2 a ni a, Venom mai bakah The Addams Family 2 ai pawhin a sum lakluh a tlem zawk a ni.

'Venom: Let There Be Carnage'
Zirawpni liam ta khan mi tam takin an nghahhleh 'Venom: Let There Be Carnage' chu tlangzarh a ni ta a, a sum lakluh a turu nghal rem rem hle.

Theatre 4,225-ah he film hi chhuah a ni a, $90,033,210 lai zu han lalut a! Hripui len hnuah North America Box Office-ah tlangzarh karah hetiang zat sum lalut thei hi an la awm loa, Covid-19 hripuiin khawvel a tihbuai hnuah chuan hei hi record a ni hial.

Ram dang aṭanga a sum lakluh nen $103,833,210 a lalut nghal der tawh a, hei hian miin Venom 2 hi an lo nghakhlel hle tih a tichiang.

Venom film hmasa khan tlangzarh karah $mtd 80.2 a lalut a, chu chu a chhunzawmna hian a rawn khum bawk a, kumin chhunga film tlangzarh zinga sum lalut tam ber pawl a ni thuai dawn tih a chiang.

Film review-tu lam ngaihdan erawh a inang lo hle a, ṭhenkhatin an fak viau laiin ṭhenkhat erawh chuan an beisei a phak loh thu an sawi thung. Rotten Tomatoes lamah chuan mi 164-in review hnutchhiahin rating 5.50/10 a hmu a, film hmuhnawm pangngai taka ngaih a ni a tih theih ang.

Venom film-a achangtupa ber Tom Hardy chuan kum 2018-ah khan Venom film pathum siam turin inremna an siam tih a lo sawi tawh a, a chhunzawmna lamah chuan mi tam takin an beisei angin Spider-Man nen pawh an intawng mai thei.

Venom 2 hian Black Widow-in hripui len hnua tlangzarh kara film sum lalut tam ber record a lo siam tawh chu a khum a, Covid-19 khawvelin a hmelhriat hnua North America Box Office aṭanga sum lalut tam ber record a siam.

Pahnihna 'The Addams Family 2', Venom 2 nen an inthlau
Computer Animated film 'The Addams Family 2' chu Zirtawpni liam ta khan US-ah tlangzarh a ni ve bawk a, Box Office-ah pahnihna niin, theatre 4,207 laiah chhuah ni mah se $17,325,007 chiah a lalut thei a, Venom 2 nen an sum lakluh a inthlau rem rem hle a ni.

'Shang-Chi and the Legend of the Ten Rings' rorelna pawh tihtawpin a awm ta a, pathumna niin $6,109,594 a lalut ve thung.

Film thar, film thar
Box Office Mojo Chart-ah film 50 tarlan a ni a, chung zingah chuan film thar eng emaw zat a awm.

Chart-a palina 'The Many Saints of Newark' chu film thar niin, 'Chal Mera Putt 3', 'The Jesus Music' leh 'Titane'-te chu pakuana, 10-na leh 11-na an ni a, film thar vek an ni bawk. Heng bakah hian 'Old Henry' (26), 'Falling for Figaro' (32) leh 'Mayday' (37) te chu film thar an ni bawk.