Glastonbury Festival headliner naupang ber tur Billie Eilish

Glastonbury Festival 2022 headliner tur a chiang tawh a, chu chu tudang ni loin American tleirawl Billie Eilish a ni.

Billie Eilish hi kum 19 chiah la ni mah se khawvela rimawi kût lian ber pawl Glastonbury Festival-ah headliner a ni der tawh dawn a, he kût headliner awm tawh zawng zawng zinga naupang ber a ni dawn.

Hemi chungchang hi Thawhṭanni khan kût buatsaihtu lam chuan an tarlang a, "Glastonbury 2022-a Pyramid Stage-ah chuan Billie Eilish chu headline a ni dawn tih phur takin kan puang a, Festival solo headliner naupang ber tur a ni. UK festival headline performance a neih vawi khatna tur a ni bawk," an ti.

Eilish hi kum 2016-a Adele headliner a nih hnua hmeichhe headliner ni leh thei hmasa ber tur a ni bawk. Nikum lamah khan Taylor Swift chu kût headliner tura biak fel vek tawh ni mah se hripui leng vangin an ṭhulh a ni.

Billie Eilish hi June 24, 2022, Zirtawpni zanah a inlan dawn a ni.