FB, IG leh WhatsApp chhiat vang khan Mark Zuckerberg-a'n sum a hloh hnem

Social media platform lian pathum Facebook, WhatsApp leh Instagram chu Thawhṭanni zan khan darkar ruk vel lai hman theih lohin a awm a, chumi avang chuan heng platform neitu Mark Zukerberg chuan sum a hloh hnem hle niin media hrang hrangin an tarlang.

Buisiness Standard chuan Zuckerberg hian $tluklehdingawn 7 lai a hloh niin an tarlang a, Bloomberg chuan $tld 6 vel a hloh nia tarlang thungin Forbes chuan $tld 5.9 vel a hloh niin an chhut thung.

Hemi avang hian Forbes mihausa list-a pangana ni ṭhin chu Zuckerberg hi parukna a nih phah a, chuti chung chuan $tld 116.8 vel zet chu a la nei niin Forbes chuan an chhut tho.

Facebook chuan Thawhṭanni zana thil thleng kha 'configuration' thlak danglam sual vang niin an sawi a, a chhiat hnu lawk khan WhatsApp pawhin Twitter lamah a platform a hman theih loh thu leh siam ṭha tura hma an lak nghal thu an tarlang zui ve bawk. Facebook chuan hmangtute data khawihbuai a neih phah loh thu sawiin, an company dintu Zukerberg pawhin an platform hmangtute hriatthiamna a dil tawh bawk a ni.

Thawhṭanni zan khan heng platform hrang hrang hman theih a nih loh avang khan ram hrang hrang aṭangin buaina report maktaduai 10.6 vel zet a lut a, online platform pakhat, website hrang hrang dinhmun tarlang ṭhintu Downdetector chuan an chhinchhiah tawh china hlawhchhamna lian ber a nih thu an tarlang hial.