Tluklehdingawm khat lalut rang ber Avengers: Infinity War

Rin ang ngeiin Avengers: Infinity War chu sum lakluh kawngah a che ṭha a, film chhuak tawh zinga sum tluk­lehdingawm khat la lut rang ber a ni. April thlaa tlangzarh film hian heti zat sum thawk chhuak tur hian ni 11 chiah a mamawh a, record a siam.

Disney & Marvel movie hian kar kalta Inrinni khan heti zat sum hi a lalut der tawh a, khawvel hmun hrang hrang aṭanga a sum lakluh hi a pung zel bawk. Sum lakluh aṭanga teh chuan American film maker lar Joe Russo leh Anthony unau te kutchhuak film hi, khawvela film hlawhhtling ber berte zingah chhiar tel a ni ngei ang.

Cleveland, Ohio chhuak Joe leh Anthony Russo te hi Captain America pawh lo hlawhtinpui tawhtu an ni a, nakkuma tih­chhuah hman turin Avengers film dang pawh siam leh an la tum cheu bawk. An kutchhuak khawvelin a hmu a, an film siam ngainatu ten a dang hmuh belh zel an duh. Russo brother hi tun lai film director zingah chuan hriat hlawh ber pawl leh lar ber pawl an ni mek.

Infinity War hian Star Wars: The Force Awakens in ni 12 chhunga heti zat sum thawk chhuaka record a lo siam tawh chu a rawn khum a ni. Zirtawpni thleng khan $mtd 974.5 zet a lalut a, heng zinga $mtd 369.7 zet chu North America aṭanga a lakluh a ni. Infinity hi China-ah chhuah a la ni lo a, Russia-ah pawh chuah mumal a la nih loh bawk avangin a suam lakluh pawh hi nasa tak a la pun rin a ni.

Hetih rual hian film chhuak tawh zinga tluklehdingawn lalut tling 34-na chiah a ni bawk. Heng zinga a tam zawk hi chu Disney tihchhuah niin, Marvel film paruk a an tel bawk. Chungte chu The Avengers, Avengers: Age of Ultron, Black Panther, Iron Man 3, Captain America: Civil War leh Infinity War-te hi an ni.

Hetih lai hian Fox tihchhuah Avatar chu sum lalut hnem ber niin, $tld 2.788 zet a lalut. Titanic ($tld2.187) leh Force Awakens ($tld 2.068)-te chu sum lalut tam zual an ni. Heng film pathum te hi $tld 2 lalut thei awm chhun an ni bawk. Hemi huangah hian Avengers: Infinity War hi a lut ve thei a ngem tih chu zawhna awm mek a ni a, a chet ṭhat zui danin a hril viau dawn a ni.