Coldplay x BTS 'Universe' a zau

Coldplay leh BTS-te thawhdunna hla mawi tak 'My Universe' chu Billboard chart hrang hrangah a che ṭha nghal hle. Billboard 200 chart-ah erawh Drake 'Certified Lover Boy' rorelna tihtawpin a awm thung a, YoungBoy Never Broke Again album tharin ro a rel ve thung.

US mipuite hla ngaihthlak nasat ber 'My Universe'
Coldplay leh BTS-te hla thar 'My Universe' hi hla mawi tak a ni tih chu sawi nawn a ngai lo, Billboard chart hrang hranga an chet ṭhatna hian a tichiang viau.

Billboard single chart hrang hrang zinga ngaihhlût hlawh ber The Hot 100 chart-ah 'My Universe' hi pakhatna a rawn ni nghal a, The Kid LAROI & Justin Bieber 'Stay'-te'n hun rei tak chhung ro an lo rel tawhna chu an rawn titawp ta a ni.

Billboard Global 200 chart bakah Billboard Global Excl. US chart-ah pawh 'My Universe' hi roreltu a ni bawk.

Thawhlehni khan British rock band Coldplay leh KPop band BTS-te hian lawmpuina an inhlan tawn nghal nghe nghe a, an thawhdunna hla Hot 100 topper a ni tih an hriat rual khan Twitter lamah an inlawmpui tawnna chhiar tur a awm nghal.

"RM, Jin, SUGA, j-hope, Jimin, V leh Jung Kook kan lawmpui a che u. Coldplayer te leh ARMY te bakah mi zawng zawng hetiang dinhmuna min dintirtute chungah lawmthu kan sawi bawk. love c, g, w, j & p," tiin Coldplay chuan an ziak.

Butter hitmaker-te pawhin, "Nangni nena thawkhoa hetiang thil a thleng thei hi kan tan chuan chawimawina a ni reng e!Big love and congrats !," tiin an ziak ve bawk.

'My Universe' hi Alternative Airplay leh Rock & Alternative Airplay chart-ah pawh 38-na leh 42-na a ni a, Rock & Alternative Airplay chart-ah a vawi khatna atan BTS hi an lang ve ta bawk a ni.

'My Universe' hi Coldplay album thar tur 'Music of the Spheres'-a mi tur a ni a, he album hi karleh Zirtawpni, October 15 hian an tlangzarh ang.

Billboard 200 chart roreltu thar chu
Kar thum zet Billboard 200 chart roreltu a nih hnuah Drake 'Certified Lover Boy' chu nek chhuahin a awm ve ta a, YoungBoy Never Broke Again album thar 'Sincerely, Kentrell' chu pakhatna a ni.

'Sincerely, Kentrell' hi YoungBoy Never Broke Again studio album pathumna a ni a, album-equivalent unit 1,37,000 hmu chhuakin kar hmasa chhunga US mipuite album ngaihthlak nasat ber a ni.

Drake 'Certified Lover Boy' chu pahnihna la ni thoin, Lil Nas X 'Montero' chu pathumna a ni thung a. Kanye West 'Donda' leh Olivia Rodrigo 'Sour'-te chu palina leh pangana an ni bawk.

Artist 100 lam ve thung
Artist 100 chart-ah pawh YoungBoy Never Broke Again chu pakhatnaah a rawn invawrh a, chart hmasa lamah 40-na niin tunkar chart-ah erawh a album thar a hit bawk a, pakhatna a rawn ni nghal dawrh mai a ni.

Drake chu pahnihna ni thungin Olivia Rodrigo chu pathumna a ni a, BTS chu palina niin Doja Cat chuan top 5 a khar a ni.