Lemchang turin Russian lemchan thiamin 'space' a pan

Russian cosmonaut pakhat, movie director leh actress pakhat chuan Thawhlehni khan lemchang turin International Space Station (ISS) an pan.

Soyuz MS-19 spacecraft hmangin heng mite hian van boruakah lem an chang dawn a, Tom Cruise, NASA leh SpaceX-te hmachhawp, a tak taka 'space' a lemchan chu an tihhlawhtlin khalh dawn ta a ni. Russia state media-te chuan he chanchin hi uar takin an tarlang a, ni 12 chhung van boruakah hun an han hmang ang.

ISS lama an chan tur film hi 'The Challenge' tih a ni dawn a, a changtunu chu tuna van boruaka inkapchhuak ta Yulia Peresild niin ani hi doctor lemah a chang dawn a, space station-a cosmonaut nunna chhanhim tura tirh lemah a chang ang. Director chu Klim Shipenko a ni thung.

Yulia Peresild hi Russian lemchan thiam lar a ni a, film pawh a chang hnem tawh hle. Kum 37 mi lemchan thiam leh a zinpuite hian October 17 hian khawvelah an rawn haw leh dawn a ni.

Hollywood superstar Tom Cruise, NASA leh SpaceX-te chuan van boruakah lemchan an tum thu an lo puang tawh a, mahse Russian lam hian Hollywood hi an chet khalh ta a ni.