Met Gala 2018 Milar inlan an Ṭhahnem

New York City-a Metro­politan Museum of Art's Cos­tume Institute ṭanpuina tura buatsaih ṭhin, Met Gala chu May 7, Thawhṭanni khan neih a ni a, mi lar inlan an ṭhahnem hle. Hollywood star rual fuan­khawm­na Met Gala 2018 hian ngaihven a hlawh a, mipui mit pawh he lamah hian a fu ṭhuap mai.

Met Gala-ah hian hollywood celebrity Scarlett Johansson, Rihanna, Jennifer Lopez, Blake Lively, Salma Hayek leh midang tam tak an inlan a, an thuam inbel te chu ropui tak a ni hlawm. Bollywood lam aṭang pawhin Priyanka Chopra leh Deepika Padukone te pawh an tel a, mit la ber pawl an ni. Kuminah hian theme atan 'Heavenly Bodies : Fashion and the Catholic Imagination' tih chu thlan a ni.

Priyanka & Deepika
Deepika chuan Met Gala 2018-ah hian Prabal Gaurang an tih chu a inbel a, Priyanka pawhin Ralph Lauren thuam a inbel. New York khawpuia Metropolitan Museum of Art-ah hian Priyanka leh Deepika te hi thlalatute mitfukna pakhat an ni a, India chhulchhuakte hian lawm an hlawh hle.

An thlalak pawh social media lamah a darh nasa hle a, sawizui pawh a tam hle. Baywatch star Priyanka Chopra leh Padmaavat star Deepika Padukone te hian Bollywood leh India hming an timawi hle. Hetih rual hian an inthuamna hian theme a hawi lo tih chu mi ṭhenkhat sawisel a a ni. 'Sunday Best' tia sawisel tawk an awm a, chu chu Kim Kardashian leh Amal Clooney ten an comment dan pawh a ni.

Red carpet
Mi lar rual fuankhawm hian mipui an hip a, thlalatu pawh an tam na ngiang mai. Red carpet-a an inthehṭhil lai vel chuan camera flash a de chuah chuah a, chetsual palh pawh hlauhawm tur tak a ni.

Rihanna thuamna danglam tak chuan mit a la hle a, Kim Kardashian leh Jennifer Lopez te an mawi viau bawk. Red carpet mawitu zingah Shailene Woodley, Zoe Kravitz leh Bella Hadid te pawh mit la pawl tak niin, fashion chinchang hre deuh tan chuan mit titlai tak tak an ni hlawm.

Human rights lawyer Amal Clooney ten an a puk thei ang ber an inbel laiin, Miley Cyrus ten thawmhnaw an mamawh tam lo hle thung! American model Bella Hadid leh Gigi Hadid thuam hak a simple viau bawk a, mit la ber te zinga mi an ni lawi. Bella chu leather leh PVC gown nen photographer rual hmaah a pen chhuak a, Gigi che vel a hmuhnawm hle bawk.

Katy Perry chu thla nei ang maiin a inzar pharh duai a, a thawmhnaw inbel milin a sam rawng a thlak bawk. Rita Ora a inhnuk hnawk thui viau a, amah mai chuan a pen hlei thei lo ang tih tur khawp a ni! Ariana Grande leh Nicky Minaj te pawhin mi an la hle.

Mipui mitfukna ber tih ngam chu Kylie Jenner leh a kawppui Travis Scott te an ni. Hmanni lawka fanu thar nei hlim Jenner leh Travis Scott te hian thawmhnaw dum an inbel a, photographer ten an che vel an hmaih mang a rinawm loh!

Met Gala 2018-ah hian milar tel an ṭhahnem a, a hmei a pain mit ti tlai tak tak vek an ni.