May14 &15 chhungin Assembly Annex-ah Edu-Option 2018

Ni hnih awh tur 16th EDU-OPTIONS 2018 chu May 14 leh 15 hian Assembly House Annex, Basement-I ah neih a ni leh dawn ta.

He Edu-Option ah hian stream hrang hranga zirna-in ṭha ber ber 40 chuangin stall an hawng dawn a, tel tura beisei zirna-in te hi UGC/AICTE accredited vek an nih avangin chhim a manhla dawn hle. Medical, engineering, management, arts, science, commerce leh technical stream dang dang dawr theih an ni dawn a, abroad a zir duh tan pawh kawng a inhawng zau hle dawn a ni.

Scholarship leh educational loan hrang hrang apply duh tan pawh stall a awm dawn bawk a, a duh apiang tan chhim theih a ni.

Zirlaite'n college an luh dawna an harsatna tawh ṭhin chu, information dik leh rintlak khawi aṭangin nge an hriat ang a, an hmuh ang tih a ni fo. Hemi sutkian nan leh zirlaite an kal leh zelna tura inkawhhmuhna atan Edu-option hi buatsaih ṭhin a ni.

Edu-Option 2018 hian a tum chu hmaichhana college leh university-a thawk ngeite leh zirlaite inhmuhna tur siam sak a ni a, zirlaite'n an duh thalin an hriatfiah duh an zawh theihna tur kawng hawn a ni.

Edu-Option neih chhung hian chawhma dar 11:00 aṭanga tlai dar 5:00 thleng stall hi hawn a ni ang. Nitin lucky draw awmin, smart phone, pen drive, earphone te a tlawhtute tan man theih a ni dawn a, luh man a awm lo ang. A tlawhtute tan nilengin quiz neih a ni dawn a, lawmman dawn tur a awm nual dawn bawk.

Edu-Option hi Mizorama education fair bul ṭantu Lynchpin leh Zalen chanchinbu ṭangkawpten an buatsaih a ni.