Billboard 200 Chart ; The Beatles record khumtu Post Malone

English rock band The Beatles chuan kum 1964 daih tawh khan album pakhat aṭanga Billboard Hot 100 chart, top 20-a lang thei hla paruk an lo nei tawh a, he record hi khum thei an awm mai lo. Mahse kum tak tak a vei hnuah American rapper Post Malone a rawn lang a, top 20-a lang thei hla pakua zet neiin record thar a rawn siam ta a ni.

Post Malone hian tun hnai khan a album pahnihna 'Beerbongs & Bentleys' chu a tlangzarh a, hla 18 zet a awm. A hla zawng zawng hi Hot 100-ah an lang phak vek a, chung zinga pakua chu top 20-ah hian an lang a ni. A hla hit pathum - Psycho, Better Now leh Rockstar te chu top 10-ah an inhlangkai bawk.

American rapper record hi a turu hle a, khum leh pawh a harsa tawh hle ang. Tun hnaia a album tihchhuah 'Beerbongs & Bentleys' hi hralh a kal hle a, Billboard 200 Chart-ah pawh a zawnin No.1 a hauh mek bawk.

American hip-hop artist J. Cole pawhin The Beatles record siam hi tun hnai khan a rawn nih rual bawk. J. Cole hian April thla khan a studio album pali-na 'KOD' chu a tlangzarh a, heta hla paruk zet chu Billboard Hot 100 chart top 20-ah hian an lang a ni.

Kum 1964 April thla khan English rock band lar The Beatles hian Billboard Hot 100 chart-ah top 20-a lang thei hla paruk zet an lo nei tawh a, hetiang ti thei hmasa ber hi an ni. He record duhawm tak hi kum 54 zet hnuah thaichhiatin a awm ta chauh a ni.