Adele hla thar karleh Zirtawpniah
English singer Adele Laurie Blue Adkins chuan karleh Zirtawpni hian hla thar 'Easy on Me' a tichhuak dawn.
Grammy award eng emaw zat dawng tawh Adele hian kum ruk vel zet chu hla thar a tichhuak tawh lo a, chumi a nih avang chuan tuna a hla thar tihchhuah tur pawh hian ngaihven a hlawh hle.
Adele hian social media lamah a music video thar tur teaser second 21 leka sei chu a chhawp chhuak a, chu ringawt pawh chuan ngaihven a hlawhin entu pawh an pung chak hle a, Twitter leh Instagram lamah darkar khat chhung lekin entu maktaduai 5 a nei hman.
La Presse-in an tarlan dan chuan Adele-i clip hi Canadian Eastern Townships-a September thlaa 'shoot' a ni a, a hla hit 'Hello'-a a thawpui Quebec filmmaker Xavier Dolan direct bawk a ni. 'Hello' video kha kum 2015-a a tihchhuah niin thlirtu tluklehdingawn thum lai a nei tawh nghe nghe.
November 2015-a a studio album pathumna '25' a tihchhuah hnuah khan Adele hian hla thar a la tichhuak leh lo ■
British singer album thar hi a chhuak hnai nia sawi thawm a tam hle nghe nghe a, ram hrang hrangah poster leh projection-ahte '30' inziak hmuh tur a awm avangin Adele album thar tur hi '30' a nih a rinawm a, album thar tihchhuah chungchang erawh hi chu chiang takin a la sawi chhuak loa, a tlangzarh hun tur pawh a la sawilang lo a ni.
November 2015-a a studio album pathumna '25' a tihchhuah hnuah khan Adele hian hla thar a la tichhuak leh lo hrim hrim a, kum thum liam taa (kum 30 mi a nih lai) a pasal Simon Konecki nen an inṭhen aṭang phei kha chuan vantlang hmuh turin a inlan tam lo viau.
Adele album thar tur hming chu 30?
Kum 30 mi a nih laiin pasal a ṭhen bawk nen khan, a album thar tur hi '30' a nih a rinawm zual a, 19,21 leh 25 titein a album hming a lo phuah tawh bawk nen, a hmaa album hming phuah dan pattern ngai pawh a ni hrim hrim.
'Rolling in the Deep' hitmaker hi artist, khawvela album hralh tam ber zinga mi ani a, tunah hian maktaduai 120 vel zet a hralh tawh anga chhut a ni. A album hmasa ber '19' kha UK-ah chuan vawi riat lai platinum-ah puan a ni tawh a, US-ah pawh vawi thum platinum-a puan a ni tawh bawk.
A album pahnihna '21' phei kha chu a hit turu a, kum 2011 leh 2012-ah khan khawvela album hralh tam ber niin copy maktaduai 31 vel zet a hralh a, Guinness Book of Records-ah pawh '21' kha chu ziah lanin a awm nual reng a ni. UK-ah phei chuan he album hi vawi 17 Platinum-a puan a ni hial!
Hetiang khawpa khawvela zaithiam huhang ngah leh miin a zai an ngaihthlak nasat, VH1 100 Greatest Women in Music list-a pangana hial ni phak hian thawm a nei lo rei tawh a, tuna a hla thar tihchhuah turin ngaihven a hlawh pawh hi a mak lo viau. Amaherawhchu, tunah chuan tunhmaa Adele kan hriat ṭhin, chum duhawm tak kha kan hmu tawh dawn lo a, Adele cher ria tak kan hmu tawh thung dawn a ni.