Deep Purple album thar November-ah

British hard rock legend 'Deep Purple' chuan album thar 'Turning to Crime' an tichhuak dawn tih an sawi.

Deep Purple hming han lamrik zawng ringawt pawh hian rual û zawkte chu an lung a leng ngei ang. Tunah hian chanchin thar duhawm tak an nei tlat mai. An album thar 'Turning to Crime' hi November 26 hian an tlangzarh dawn.

Thla 15 vel liam taah khan Deep Purple hian an studio LP 21-na 'Whoosh!' chu an lo tichhuak tawh a, UK album chart-ah palina hial an nihpui hnuah tunah album thar chungchang hi an sawi chhuak leh ta a ni.

Cover album maw!
An album thar tura an single hmasa ber '7 And 7 Is' chu nimin lamah khan an chhawp chhuak tawh nghe nghe a, Deep Purple fan-te tan chuan a ngaihven chi viau ang.

'Turning to Crime' hi digital download theih turin streaming platform hrang hrangah an tlangzarh dawn a, CD pawhin an tlangzarh dawn bawk a, tunah hian Amazon leh an band website lamah order lawk theihin a awm tawh a ni.

Kum 1968-a indin daih tawh, Ritchie Blackmore leh Rod Evans-te pawh an lo tel tawhna ṭhin 'Deep Purple' hian an studio album 22-na tur hi cover album a ni dawn tih sawiin, EarMusic kaltlangin an tlangzarh dawn tih an sawi bawk. An cover album tihchhuah hmasak ber tur a ni a, hla 12 an dah dawn a, track listing leh album art pawh an tichhuak tawh a ni.

Tunah hian an drummer 'Ian Paice' chiah original member a awm tawh a, ani hian kum 1968 aṭang khan 'Deep Purple' khuang hi a la pu char char a ni.