‘Squid Game’ fashion nghawng a na! Slip-On Vans var 7,800% in hralh a kal!

NETFLIX series ‘Squid Game’ lar zia kan hria a, Mizo ṭhalaite pawhin hmuhnawm kan titlang hle tih chu hai rual a ni lo. He Korean series vang hian Vans var, thawlh thawka bun chi chu 7,800% laiin hralh zu han kal a!

‘Squid Game’ tihchhuah a nih aṭang khan Slip-On Vans var hi 7,800% in hralh a kal zawk niin Sole Supplier data chuan a tarlang. Vans pheikhawk var chiah hi hralh a kal loa, series-a an thawhnaw hak tracksuit hring leh var inpawlh pawh kha hralh a kal viau niin Variety chuan a tarlang bawk.

Fashion shopping platform Lyst pawhin Slip-On Vans var hi series tihchhuah a nih hnuah khan zawngtu 97% laiin an tam zawk tih an tarlang ve bawk a, Korean thriller series hian incheina kawngah nghawng a nei na hle tih hei hian a tichiang.