Hranghlui zaithiam Zira Hnamte a fam Dawn a sei, lenrual an kim ta lo

Hranghlui zaithiam, Mizo hnam rohlu Zirkunga Hnamte (Zira Hnamte) chu nimin khan kum 69 mi niin lung nâ vangin a thi.

Rual u zawkte zingah chuan Zira Hnamte hi tunge a nih sawi vak pawh ngai lo khawpin a vanglai chuan a lar a, a hlate chu Zoram dung leh vangah radio-ah an play chuah chuah a ni ber. 'Romei' leh a hla sak lar 'Lenrual an kim ta lo' tihte phei chu a hunlaiin hre lo an awm lo hial awm e. A hla phuahte a mawiin belhchian an dawl a, a zai thiam bawk nen a zai thiam vang leh a hlaphuah thiam vangin chawimawina pawh eng emaw zat a dawng tawh a ni.

Zira Hnamte hi April 23, 1952 khan Darzo khuaah a piang a, a naupan laiin a nu chu Thingsaiah an sawn a, Thingsaiah hian a seilain a ni. A pa chu Hrangkaia niin a nu  Chalchani Chhakchhuak a ni a; unau pariat niin ani hi a upa lama palina a ni.

Kum 1977 khan K Rothang­puii nen inneiin fa pali an nei a, Aizawl Bungkawn Tlangvengah chengin a thih ni thleng hian hetah hian an khawsa a ni. 

PU (Sc) a pass hnuah sorkar hna thawkin department hrang hrangah a awmkual a, kum 2018 khan Research Officer niin Soil Department aṭangin a pension. 

A lar vanglai tak, kum 1983 khan piangtharin Pastor leh Speaker a zui nasa ṭhin hle.

Zira Hnamte hi kum 1974 vel aṭang chuan a zai thiam leh hla phuah thiam vangin Zoram dung leh vangah a lar hle a, AIR Shillong leh Aizawlah hla 160 vel a thun a, a hlate hian thlan pawh an hlawh ṭhin malh malh hle.

Kum 1974 Mizo Ṭhalfavang Kut (Shillong)-a ama hla ngei 'Khiangawi Nuthai' tih sain 2nd prize a dawng a, chuta ṭang chuan AIR Shillong-ah koh a hlawh nghal a, chutah chuan hla pakua lai a thun hman a ni.

Kum 1979 khan beat con­test-ah mahni hla phuah ngei sa thiam ber lawmman Buizova Trophy-ah tape recorder a dawng a, zaithiam lawmman pathumnaah radio a dawng bawk. Kum 1980 khan Mizoram beat contest-ah Mizo mipa zaithiam ber lawmman a dawng leh bawk.

Lelte Weekly Award thlan­naah pawh Best Male Artist leh Best Song Composer lawm­mante a dawng tawh a, Kum 2006 khan Lifetime Achievement Award a dawng bawk a ni.  

Lenglawng leh Pathian fakna hla hi 71 vel a phuah hman a, MZI dintute zinga mi niin audio album pariat a tichhuak hman a ni.

Zira Hnamte hi kum 2014 khan Town Planning-a a thawh laiin office-ah heart attack neiin heta ṭang hian buaipui ṭan a ni a, Aizawl-a enkawl a nih hnuah Kolkata-ah hun eng emaw chen enkawl a ni.

 Aizawl a lo hawn leh hnuah pawh doctor-te thurawn angin enkawl chhunzawm zel a ni. Hemi hnu hian hun eng emaw chen chu pawn chhuak loin ṭhenrual pawh pawl loin hun a hmang a, a boral hma zan, Thawhṭanni zanah pawh khan insawiselna em em nei loin ṭha takin a la mu nghe nghe.

Mahse Thawhlehni, Nimin zing dar 4:40 vela a harh kha a thawk a buai avangin Civil Hospital panpui a ni a, doctor leh nurse-te'n theihtawpa an buaipui hnuah dar 5:40 khan chatuan ram a pan ta a, chhun dar 12 khan BCM City Church Kohhran Hall-I, Aizawl Bungkawn Tlangvengah vuiliam a ni ta a ni.