‘Peaky Blinders’ film 2023-ah chang dawn

BBC series lar ‘Peaky Blinders’ creator Steven Knight chuan kum 2023-ah ‘Peaky Blinders’ film an chang dawn chauh tih a sawi.

‘Peaky Blinders’ series hi season 6 thleng siam a ni dawn a, chumi zawh hnuah chuan movie pangngai an siam leh dawn a, chu chu a hmawr an bawkna tur a ni ang. BFI London Film Festival panel-a an ṭhutnaah Knight chuan season 6 pawh an chang zo tawh a, editing pawh an zo fel hnai tawh tih sawiin nakkum nipuiah chuan tihchhuah hman an tum thu a sawi bawk.

British writer hian Variety magazine hnenah ‘Peaky Blinders’ film chungchang hi a sawi a, kum 2023-ah production an ṭan dawn tih a sawi. ‘Peaky Blinders’ bik hi chu movie an tihchhuah hnuah hian a hmawr bawk dawn mah se ‘Peaky Blinders’ khawvela thil thleng tho show dan buatsaih a rilruk thu a sawi tel thung. Spin-off ang chiah chu a ni dawn lo tih a sawi bawk a ni.

‘Peaky Blinders’ hi September 12, 2013 khan BBC Two-ah pek chhuah ṭan a ni a, tunah hian season 5-na thleng chu an pe chhuak tawh a ni. Season hmasa pali chu BBC Two-ah an pe chhuak a, season 5 aṭang khan BBC One-ah pe chhuak thungin, season 6 pawh BBC One-ah bawk an pe chhuak ang.

He series-a changtu ber zinga mi, Elizabeth 'Polly' Gray lema chang Helen McCrory chu kumin April thla khan cancer vangin a boral a, chumi avang chuan 'Peaky Blinders' season 6 hi engtiang takin nge an her danglam dawn hriat a chakawm tawh angreng viau a, 'Polly' thar kan hmu dawn nge a story an twist dawn tih chu 'Peaky Blinders' fan-te hriat chak ber pawl a nih a rinawm. Chutihrualin Helen McCrory hmuh tur a awm ta lo tur erawh 'Peaky Blinders' hi a famkim dawn ta lo hle a ni.