Olivia Rodrigo-i'n Rosé a fakna anka a thlum

"A ṭha ber a ni tawp. A hma pawhin kan chhuak ho tawh a, a nihna takah angelah chuan a sweet ber a ni tawp mai. A bula ka ṭhu thei kha ka hlim lutuka, ka ṭhut hma kha chuan ka zam hle a, mahse, kan ṭhudun ta kha chu, Lalpa! heta hi ṭhian ka nei, a ni tawp. A fel ber a ni tawp mai, ka fak tawp thei lo. Talent a nei ṭha. Khawvela mifel ber a ni tawp," - Olivia Rodrigo

K-pop girl group BLACKPINK hi khawvel ram hrang hranga chengte hian kan lo ngaihvenin an zunah kan lo uai tlang a ni ang e. Khawthlang zaithiam lar ber zinga mi Olivia Rodrigo pawh chung zingah chuan a bang bik hauh lo.

Teen Vogue P. Claire Dodson chuan an magazine-a Olivia Rodrigo an kawmna an tihchhuah zinga an tihchhuah tel loh, Olivia-i'n Rosé-i a chhuahpui chungchanga a ngaihdan an zawhna a chhanna chu a Twitter lamah a dah chhuak a, chu chuan ngaihven a hlawh viau.

Olivia Rodrigo chuan Rosé-i chu a fak viau a, a bula awm chu nuam a tih thu leh fel a tih thute a sawi uar viau nghe nghe.

Thla hmasa Met Gala-ah khan Rosé leh Rodrigo-te hi an kal ve ve a, thla te pawh an la ho nghe nghe a nih kha. Rosé leh CL-te chu thla hmasa Met Gala-ah khan inlanin Korean artist hmeichhe zinga Met Gala red carpet zawh hmasa ber an ni hial.

Met Gala hma khan Olivia leh Rosé-te hi an lo chhuak ho tawh a, July thlaah khan stylist Devon Carlson leh director Petra Collins-te nen zanriah an kilho lai an thlalak pawh internet lamah hmuh tur a lo awm tawh a ni. Heng artist pahnihte hi Interscope Records-in inremna an siampui ve ve tawh an lo ni bawk nen, hla thar an tichhuak dun dawn nia ngaitu pawh a hunlai khan an tam viau nghe nghe a nih kha.

Olivia Rodrigo hi Teen Vogue magazine October cover girl niin he magazine-in an kawmnaah hian kum naupang tê nichunga hlawhtlinna a chan dan, a hla hit 'Good 4 U'-a Paramore Hayley Williams leh Joshua Farro-te credit a pek avanga sawiselna a tawh chungchang velte pawh a sawi chhuak a ni.

Music-ah hian engmah thil thar a awm lo tia a sawi phei chuan sawizui a hlawh angreng hle. Rodrigo,"Music zawng zawngah hian midang hi kan in-inspire tawn vek a ni. Ka hlathu reng reng hi ka thinlung leh ka nun aṭangin ka ziak chhuak hmasa ber. A hla thu ka phuah phawt a, ‘good 4 u’ thluk hi tuk khat ka inbual laiin ka phuah a ni," tiin a sawi.

Kum 18 mi lek American tleirawl duhawm hian album pakhat 'Sour' chiah a la tlangzarh a, khawvela zaithiam lar ber pawl a ni der tawh. A album hmasa ber hi Billboard 200 chart topper a nihpui nghal thei a ni.