Hillsong Worship hla thar Never Walk Alone

Hillsong Worship chuan Zirtawpni liam ta khan hla thar 'Never Walk Alone' an tichhuak a, he hlaah hian Mi-kaisha Rose an thawhpui a ni.

'Never Walk Alone' hi streaming platform hrang hrangah ngaihthlak theihin a awm tawh a, worship music ngainatute tan chuan a ngaihven chi viau ang. Audio an tihchhuah bakah acoustic version, live-a mawi taka an sak pawh ngaihthlak tur an chhawp chhuak tel bawk.

Hillsong hian an hla thar tihchhuah hi an album thar tur 'These Same Skies'-ah an dah dawn a, he album hi live album tur niin November 5 hian tlangzarh an tum a ni.

'These Same Skies'-ah hian 'That's the Power (Ft. Benjamin Hastings)',

'Hope of the Ages (Ft. Reuben Morgan)' leh 'Fresh Wind (Ft. David Ware)'-te pawh an dah tel dawn tih a chiang tawh.

"Pathian thutiam hi kan ring ngam. Kan hnena a awm hi kan tana ramtiam chu a ni. Min chhandamtu Pathian ngei chu kan chakna leh kan phaw a ni ti hre chungin huaisen takin hmalam kan pan thei Kan hmahruaitu chuan engtikah mah min thlahthlam ngai lo ang," tiin Hillsong Worship member Ben Fielding chuan an hla thar chungchang hi a sawi.

Hillsong hlate hi khawvela fakna hla sak hlawh ber zinga mi an ni ngei ang. The Christian Beat-in a tarlan dan chuan an hlate hi ram hrang hrangah mi maktaduai 50 velin kar khat chhungin an sa anga chhut a nih thu an tarlang. Tunah hian Hillsong hla hi streaming platform lamah vawi tluklehdingawn sarih vel stream a ni tawh a, album copy maktaduai 20 vel an hralh tawh a ni.

Kum 2018 khan Hillsong hian an hla hit 'What A Beautiful Name' kha Grammy-ah Best Contemporary Christian Music Song/Performance an dawnpui tawh a, GMA Dove Awards phei chu eng emaw zat an dawng tawh.

Live worship album ṭha tak tak tichhuak ṭhin Hillsong Worship hian live album hi 26 lai an tichhuak tawh a, 'These Same Skies' hi 27-na tur a ni.