Internet Movie Database-a rating sang ber The Shawshank Redemption

Film hlawhtling tehna hi a inang lo thei a, sum leh pai zawnga teh chuan Avengers: Endgame aia hlawhtling film dang a awm lo ang. Mahse mi hrang hrangin an film en hmuhnawm an tih leh tih loh rating an pek theihna hi Internet-ah hian a awm ve nawk a, chung zingah chuan Internet Movie Database (IMDb) hi a lar ber pawl a ni awm e. Google-ah film han zawng ila, IMDb link hi awm hmasa ber pawh a ni deuh ziah a ni. Chutiang khawpa Internet khawvela film rating petu site larin rating a pek san ber chu sum pawh lalut tam em em lo, kum 1994-a tlangzarh daih tawh 'The Shawshank Redemption' hi a ni tehtlat a!

Mizo zingah pawh he film hi en tawhtu an tam tih a chiang a, 'spoiler'-ah han ṭang zeuh pawh ni ila a pawi awm lo e. 

Kum 1947 aṭanga kum 1966 inkar vela thil thleng anga chan a ni a, jail tang film a ni. Banker Andy Dufresne chanchin niin, a nupui leh a nupui ngaihzawng thihnaa puh niin thiam loh chantir a ni a, dam chhung tang tura tih a ni a, Shawshank tan-inah dahluh niin, tan-in nihphung tam tak hmuh tur a awm.

Andy Dufresne hi mifing tak a ni a, tan-in a awm chhung hian danglamna tam tak a thlen a, kawm tur ṭhian pawh a thlang uluk hle.

Kum 19 lai tan-ina a tan hnuah jail tang rawn lut thar hnen aṭangin a nupui leh a nupui ngaihzawng thattu a hre chhuak a, thubuai thehluh ṭhat leh a dilna tan-in enkawltuin a phal lo a, a nupui thattu chungchang hrilhtu chu an that zui bawk. 

Mahse Andy hi kum 19 a tan chhung hian a lo awm mai mai lo a, a tanna 'cell' bang kha thui tak verhin a duh hun huna tlan chhuak mai thei turin ruahmanna engkim a lo siam sa vek a ni. Chumai chu la ni loin a tlanchhuah huna a sum hman tur a khawl lawk dan kawngte chu a fing hle bawk.  A nupui thih dan chungchang hrilhtu a thih takah chuan tan-in aṭang chuan a tlan chhuak a, Mexico rama tuipui kam lamah a tlanchhe zui ta a, a tlan chhuak tih tan-in enkawltute'n an hriat meuh chuan zawng hmuh rual a ni tawh lo.

The Shawshank Redemption hian IMDb-ah hian rating 9.3 star a hmu a, a dawttu chu The Godfather (1972) kha niin 9.2 star a hmu thung. Pathumna chu Christopher Nolan film The Dark Knight(2008) kha  ani bawk. Heti taka rating hmu sang tur hian vote 22,49,081 laiin rating an pe a, IMDb movie rating-ah hian vote thlaktu nuai 2 awm tlinna hi a tam lo a, The Dark Knight nen deuh chiah hian an hmu tling.

Film siamna atan hian budget $mtd 25 an nei a, tlangzarh tirha threatre hrang hranga an han chhuah kual khan $mtd 16 chiah sum an hmu let a ni. Khatih hunlaia a elpui film lar Pulp Fiction leh Forrest Gump-te ang lo takin hmeichhia hmuh tur an awm mang lo a, chuvang chuan sum lakluh lamah a hlawhtling lo niin an ngai.

Mahse film ṭha na na na chu thup reng thei a ni lo a, Academy Award lamah nomination paruk lai a hmuh tak siah chuan theatre lamah a tla na thar hle a, khawvel pumah $mtd 58.3 lai chu a lalut leh ta tho a ni.

Andy Dufresne lemah hian Tim Ribbons a chang a, Andy ṭhianpa ber Ellis Boyd "Red" Redding leh film narrator-ah Morgan Freeman a chang a, William Sandler pawh a inlan bawk.

Project bul an ṭan tirhah chuan Tom Hanks, Tom Cruise, leh Kevin Costner-te pawhin Andy lema chan hi an chak niin an sawi. 

The Shawshank Redemption hi fiction a ni a, kum 1982-a horror leh supernatural fiction ziaktu lar Stephen Edwin King ziah a ni. 

'Rita Hayworth and Shawshank Redemption' tih lehkhabu behchhana siam a ni a, King hian a lehkhabu ziah film-a siam zinga a ngainat ber zinga mi a nih thu kum 2016 khan a sawi.

Box office dissappointment mah ni se film lam review ṭhinte chuan The Shawshank Redemption hi an fak hle a, a bikin Morgan Freeman hian fak a hlawh zual.

British movie magazine Empire chuan kum 2008 khan '500 Greatest Films of All Time' list-ah No.4-ah an dah a, tlangzarh a nih aṭanga kum 17 lai a liam hnuah BBC Radio favorite-film poll-ah pawh vote hmu tam ber a la ni thei.

Tim Robbins pawhin a kalna apiangah miin an nun thlaktu movie a nih thu an la hrilh fo thu a sawi a, khawvela tan-ina tang zinga huhang ngah ber zinga mi Nelson Mandela meuh pawh khan Shawshank chungchang hi a lo sawi niin Robbins chuan a sawi.

Avatar leh Avengers-te angin sum lalut hum hum lo mah se entute mit a tlung a, film ṭha sawi apiangin sawi hmaih a ni tawh ngai dawn lo a ni.