Mystical Mizoram Ṭhazual Lengzem ; Mathlenga 'A pian a mawi' a mawi ber

Mystical Mizoram Ṭhazual Lengzem chart-ah kar hmasa lama pahnihna Mathlenga 'A pian a mawi' chu pakhatna a ni.

'A pian a mawi' a mawi ber
Mizo Idol star Mathlenga chuan thla nga vel liam taah khan hla mawi tak 'A pian a mawi' a rawn tichhuak a, Ṭhazual chart-ah pawh a inlan har lo hle.

He hla hi ama phuah ngei a ni bawk a, a sa mawiin a sa hnehsawh hle a, chart-ah pawh hma sawn zelin tunah chuan pakhatna hial a rawn ni ta a ni.

A satuin a sa thiam chu thuhran, music video hmuh a nuamin Kima Chhangte kut chhuak music mawi takin a pawlh mawi bawk nen, pakhatna a ni hi a phu viau. Chart lehah pakhatna a la ni thei dawn em tih chu hriat a chakawm tawh viau mai.

Pahnihna Benjamin Sum, Pathumna JT Production

Tunṭum Ṭhazual top 5 chu mipa lamin an luah vek mai. Pahnihna chu tunlaia Mizo lengzem singer lawm hlawh ber pawl Benjamin Sum hla hit 'Chhingmitin biahthu kan hlan' a ni a, chart lehah pakhatnaah a rawn invawrh tawh mai thei a ni.

Pathumna chu JT Production hla lungrun tak 'Pialralah tal' kha a ni thung.

Chart-a lang dangte chu
R. Lalruatkima 'Nemten ka chawi nang che' chu palina a ni a, Keimah Senes, Tlangval Tlumtea X Lil Me-te chuan 'Thlabial zan' hmangin Top 5 an khar.

Marina Vanhriatpuii Varte chu parukna a ni thung a, Manuna, Essy, Zaii Hauchhum leh Feli Fanai-te pawh chart-ah hian an lang a ni.