John Lennon vangin The Beatles an keh darh?

The Bealtes bassist Sir Paul McCartney chuan an band keh darhna kawnga mawhphurtu hmasa chu John Lennon a nih thu a sawi chhuak mauh mai!

The Guardian-in an kawmnaah Paul McCartney chuan, "Keh darh tur khan engmah ka ti lo. Kan Johnny kha lawm," tiin a sawi a, sawi chhunzawm zelin, "Ni khat chu John kha room-ah rawn lutin Beatles ka chhuahsan dawn, a rawn ti a. Chu chu inṭhendarhna tura hmalakna a ni em, nge a ni lo?

"Ka band a ni a, ka hna a ni a, ka nun a ni bawk a, chhunzawm zel ka duh a ni," tiin a sawi.

An band huntawna harsa a tihlai ber pawh sawi chhuakin, "Lennon khan thutlukna a siamfel tawh a, band member la bang- kei, Ringo Starr leh George Harrisson-te chuan harsatna chu kan hmachhawn a ngai a, kan manager Alleb Klein khan chinfel a nih hma chuan ngawi reng turin min fuih bawk nen.

"Hun eng emaw chen chu engmah thleng lo anga kan awm a ngai a, The Beatles kha a tawp dawn tih hre reng chungin kan kalbo ngawt thei si loa, kan huntawn kha a mak tak zet a ni," tiin McCartney chuan an keh darh chungchang a sawi chhuak.

Paul McCartney hian kum 1970 khan The Beatles hi a khing a, chumi chungchang pawh chu sawiin Klein-a thuhnuaia a ṭhiante an awm vang chauha khing a nih thu leh a hnuah lawmthu an hrilh let zawk thu a sawi bawk.

Lennon khan band kha chhuahsan lo se chuan The Beatles kha hun rei zawk an kalpui a ring tih a sawi bawk a ni. "John khan Yoko bulah khan nun thar a din a ni. Society hlata awm kha a duhdan a ni reng ṭhin reng bawk a, a Aunt Mimi khuahkhirhna bula seilian a ni a, zalen taka awm kha a chak ṭhin a ni," tiin Lennon chungchang a sawi zui a ni.

English rock The Beatles kha mi tam tak ngaihah chuan vawiin thlenga band ropui ber an ni. Kum 1960-ah Liverpool-ah indinin kum 1970-ah kha chuan an keh darh leh der tawh a, kum 10 chhung vel lek khan khawvela band ropui ber pawl, khawvel awm chhunga an hming dai tawh lo turin hming an chher hman a ni.

UK Album chart-a No.1 ni ngun ber record te, Billboard Hot 100 chart No.1 ni ngun ber record te leh UK-a single hralh hnem ber record-te an siam hman. Chumai a la ni lo, artist zinga an rimawi hralh hnem ber nia ngaih an ni a, ram hrang hrangah unit maktaduai 600 vel zet an hralh anga chhut niin chawimawina pawh an dawng hnem rem rem hle.

BBC Radio 4 series "This Cultural Life"-ah October 23 hian Paul McCartney hi a inlan leh dawn a ni.