Rebecca Lallawmsangi 'Zinkawng' vawiinah

'Kan khua' tih hla hmanga YouTube lama record duhawm tak lo siam tawhtu Rebecca Lallawmsangi hla thar 'Zinkawng' chu zanin tlai dar 5-ah hian a YouTube channel lamah thlira ngaihthlak theihin a awm tawh dawn.

August thla tawp lamah khan he hla hi tihchhuah a tum thu Rebecca-i hian a lo sawi zauh tawh a, mahse rokhawlhna eng emaw avangin vawiin hian a tichhuak thei dawn ta chauh a ni.

He hla hi 'Kan khua' phuahtu Peka Fanai phuah bawk niin music pawh amahin a produce a ni a, Audio Recording chu The Pee Bee Records niin video chu Daama Chawngthu kut chhuak a ni dawn thung. Production team-te hi 'Kan khua' project-a a thawhpuite tho kha an ni a, chuvang chuan a 'hit' leh ngei beisei ang.

Rebecca-i chuan, "A hla thuah hian Mizote min tihmingṭha em emtu leh zin mite hip em em ṭhintu Nghah loh dawrte pawh a rawn lang a ni. Hetiang lam hla hi Mizote hian kan la nei vak lem lo a, zin nuam timi tan chuan hla ngainat awm tak a nih ngei kan beisei. Rhyming Scheme uluk tak nena he hla hi ziah niin, hla thu danglam tak tak hman a ni bawk.," tiin Vanglaini a lo hrilh tawh a, hla ngainatawm tak a nih ngei a rinawm.

Music video pawh hmuh a nuam dawn tih a chiang. Kimkima, Fiona leh Cassettes-te pawhin an lo thawhpui tawh Reuben Lalmalsawma chuan video a direct a, a hla a mawi piah lamah thlir a manhla dawn tih a chiang. Zinkawnga hla ngaihthlak tur ṭha tak Rebecca-i hian min hlui dawn niin a lang a, a zai ngainatute chuan zanin tlai aṭang hi chuan duh hun hunah a YouTube channel lamah kan hmet chhuak thei tawh dawn a ni.