Besei aia sum lalut tam lo 'No Time to Die'-in ro a rel

James Bond film thar ber 'No Time to Die' chu Zirtawpni liam ta khan US lamah tlangzarh a ni ve ta a, sum lakluh kawngah beisei pha lo deuh mah se tun kar tawp chhunga theatre hrang hrang aṭanga sum lalut tam ber a ni tho.

'No Time to Die' dinhmun tak chu
'No Time to Die' hian US-ah hian tlangzarh kar tawpah $maktaduai 70 tal chu sum alakluh theih rin a ni a, beisei a pha lo deuh nachungin a sum lakluh erawh a tam viau tho. Tun kar tawp liam ta chhung khan theatre 4,407-ah chhuah a ni a, $55,225,007 lai lalut thoin Covid-19 vanga khawvel a buai hnua tlangzarh kara sum lalut tam ber zingah chuan a tel pha tho.

James Bond film hi chu 'Marvel' a ni miau loa, entu leh lawmtu pawh tlemin an upa deuh bawk nen, MCU film-te anga che ṭha tura beisei erawh thil tih chi a ni lo ang. James Bond film chhuak tawh zingah tlangzarh kara $mtd 100 lalut tling an la awm lo a, 'Skyfall' kha la che ṭha berin $mtd 88.4 a lalut a ni.

Daniel Craig-a 007 film hnuhnung ber hi US-a tlangzarh a nih hmain ram dang eng emaw zatah tlangzarh a ni thung a, chumi avang chuan ram hrang hrang Box Office aṭanga a sum lakluh belhkhawm chu $314,253,007 a ni der tawh a, hripui len hnua film hlawhtling ber pawl chu a ni tho tho.

No Time to Die hi James Bond film 25-na a ni a, Daniel Craig-a 007 film hnuhnung ber tur a ni bawk ■

Rami Malek, Lashana Lynch, Billy Magnussen, Ana de Armas leh David Dencik-te inlanna film hi nikum lama tlangzarh tum tawh kha niin, tlangzarh hun tura an ruahman aiin thla 18 laiin an tlangzarh tlai a; hripui vanga film tlangzarh hun sawn hlat hmasak ber zinga mi a ni.

Critics lamin he film hi an fak tlangpui a, Daniel Craig-a hmawr bawk dan pawh an duhthu a sam hlawm a nih hmel. Rotten Tomatoes lamah pawh critics 298 laiin an review a, chuta ṭang chuan rating 7.4/10 lai a hmu.

'No Time to Die' hi tunah hian kumin chhunga film sum lalut tam pakuana a ni mek a, a sum lakluh zat erawh hi chu a la pung nasa dawn tih a chiang hle a ni.

Venom 2 sum lakluh a la tam
Kar hmasa lama sum lalut tam ber 'Venom: Let There Be Carnage' chu pahnihna a ni ta thung a, chuti chung chuan $31,753,623 lai la lalut theiin ram hrang hrang Box Office aṭanga a sum lakluh tawh zat chu $185,319,239 a ni.

Film sum lalut tam zualte
'The Addams Family 2' chu sum lalut tam pathumna niin $10,114,981 a lalut a, Venom 2 nen an sum lakluh a inthlau hle.

'Shang-Chi and the Legend of the Ten Rings' chu palina a ni a, 'The Many Saints of Newark' chu pangana a ni thung.

Film thar
Pariatna 'Lamb' chu film thar a ni a, 10-na 'Met Opera: Boris Godunov' pawh film thar a ni a, James Bond bakah hian heng film pahnih hi top10-a film thar lang phate chu an ni. Mass (25) leh Golden Voices (32)-te chu Box Office Mojo chart-a film thar lang an ni bawk.