Billboard Music Award nominee an hrawl Perform tur zingah Jennifer Lopez

'Billboard' tih ṭawngkam hman a nih tawh chuan rilruah music a lang nghal a, zaithiamte hlawh­tlinna leh lar tehna pakhat pawh a ni reng a ni. Billboard Music Award chu May 20 khian MGM Grand Garden Arena, Las Vegas-ah sem a ni leh dawn a, nominee an hrawl a, Jennifer Lopez perform en tur a awm dawn bawk avangin a nghahhlelhawm hle.

Billboard Music Award nominee hi puan a lo ni tawh a, hming chawpchhuahte pawh 'top' tia sawi theih deuh vek an ni. Top Artist award atana thlan theih zingah Drake, Kendrick Lamar, Bruno Mars, Ed Sheeran leh Taylor Swift te an lang a, a pui dawn hle. Tunlai zaithiam zingah chuan a 'ber' tih ngam ṭhah an ni a, ngaihven pawh a hlawh hle.

Hetih lai hian Top New Artist award dawng thei tura hming lang pawh - 21 Savage, Camila Cabello, Cardi B, Khalid leh Kodak Black tih te an ni nawk a, dahhniam theih a ni lo.

Mipa lamah Drake, Kendrick Lamar, Bruno Mars, Post Malone leh English singer Ed Sheeran te chu Top Male Artist award dawng thei tur an ni. Top Female Artist ni thei turin Camila Cabello, Cardi B, Halsey, Demi Lovato leh Taylor Swift te an lang a, tour neia thang mek Taylor Swift chu award dawng turin a khan hle.

Jennifer Lopez
Award ngaihlutute tana thu lawmawm chu American singer Jennifer Lopez perform thlir tur awm tur hi a ni. April thlaa sem Billboard Latin Music Award-ah pawh lo inlan tawh Lopez inlan leh tur hian fan-te pawh a tiphur hle a ni. J.Lo hi 2014 khan Billboard Music Award-ah hian a lo intheh ṭhil tawh bawk a, Icon Award a dawng nghe nghe.

Kuminah hian J.Lo bakah hian Camila Cabello, Shawn Mendes, Kelly Clarkson, John Legend, Dua Lipa leh Korean boy band lar BTS te chu an perform dawn bawk a ni.

Host - Kelly Clarkson
Award sem nan ni tam a awm tawh loh avangin host tur an inrin siak laih laih. Hetih lai hian NBC chuan American singer Kelly Clarkson chuan award sem hi a host dawn tih Thawhlehni khan an puang a, mipui a barakhaih hle. Host tur hian mi eng emaw zat hming lam rik a ni a, a tawpah Clarkson koah a tla ta a ni.

'Because of You' singer chuan, "Ka inbuatsaih nasa hle a, award ceremony chhung hian vawi 20 vel inthlak hman turin ka inruahman a ni!" a ti. Pink hming pawh lami riin, "Amah angin ka thlawk kual vel dawn a ni" a ti bawk. Clarkson hi a phur tawh hle a, a inbuatsaih nasat thu a sawi chul mai.