Billboard 200 Chart ; A zawna kar thum chhung No.1 hauh thei Post Malone
American rapper Post Malone chuan Billboard 200 Chart-ah a zawnin kar thum chhung No.1 a huah ta a, a ropuina chu belhchhahin a awm zel.
Post Malone hian tun hnai khan a album pahnihna 'Beerbongs & Bentleys' chu April 27 khan a tlangzarh a, hralh a kal rem rem hle. Tlangzarh aṭangin chart-ah dinhmun sang ber a luah nghal chat a, nek chhuak thei an la awm lo. A album hi kar liam ta khan copy 140,000 zet hralh chhuah leh a ni a, US-ah chuan album hralh tla ber a ni mek.
Post Malone hian a album-ah hian Swae Lee, 21 Savage, Ty Dolla Sign, G-Eazy, YG leh American-Trinidadian rapper Nicki Minaj te a thawhpui a ni. Single pali - Rockstar, Candy Paint, Psycho leh Ball for Me te chu a lo tichhuak tawh a, a hit viau hlawm. Rockstar hi American rapper 21 Savage nen an sa dun a, Psycho hi Ty Dolla Sign chuan a feat thung a ni.
Record siamtu
Post Malone hian English rock band The Beatles ten Billboard 100 chart-a record an lo siam tawh chu a khum a, a vawk lal len mek. 'Beerbongs & Bentleys' album-a hla 18 zinga pakua chu chart-ah hian top 20-ah an lang a, The Beatles ten kum 1964 daih tawha record an siam chu a khum a ni. English rock band lar hian top 20-a lang phak hla paruk an nei a, an record chhuanawm tak ni kum eng emaw zat hnuah thaichhiatin a awm ta a ni.
Post Malone hian record duhawm dang a a siam bawk a, a albuma-a a hla zawng zawng hi Billboard Hot 100-ah an lang phak vek a, a hla hit pathum - Psycho, Better Now leh Rockstar te phei chu top 10-ah an inhlangkai a ni.
Billboard 200 chart-ah pawh hian a cheṭha hle a, record siam belh thei dinhmunah a ding mek. A album hian platinum a kai tawh a, internet streaming-ah pawh record a siam leh der tawh bawk.