Tlangval huaisen leh tlawmngai R.Hmingmawia chawimawi

May 14, Thawhṭan­nia Bawngkawn bazar, Samsung Centre sira electric ban kang nasa tak mai ṭhelhtu Ram­hlun South tlangval R.Hmingmawia chu nimin khan chawimawi a ni.

Electric ban kan hun hi chawhnu dar 1:30 vel a ni a, a bul hnai Bawng­kawn SBI-a guard Hmingmawia chuan huaisen takin kang hi a ṭhelh. A nunna atana hlauhawm thei tih hre chunga, midangte himna tura huaisen taka ke pen chuak Hmingmawia hi Samsung Centre, Bawng­kawn chuan nimin khan an dawrah chawimawina inkhawm tawi an buatsaih a, Samsung lamin TV an hlan a ni.

Hmingmawia hian a duty-na bul hnaia electric ban a kang tih a hriat rual hian fire extinguisher nen a thawk chhuak nghal a, ṭelh turin theih tawp chhuahin a bei. Fire extinguisher bur khat a hman zawh hnuah bur dang a la leh a, mahse a ṭhelh mih theih mai loh avangin tui nen a ṭang kawp ta a ni. Kang a ṭhelh­na lamah hian a kekawr pawh a kang a, mahse hliam erawh a tuar lo a ni.

Hmingmawia chuan, "Electric ban a kang tih min rawn hrilh rualin fire extinguisher nen ka tlan chhuak nghal a, bur khatin a daih loh avangin a dang ka chah belh leh. Chuti chung pawh chuan a la reh theih loh avangin tuiin ka theh a, theih tawp ka chhuah a ni" a ti.

"Mipui an chiai nasat avangin ka tan a hlauhawm thei a ni tih pawh hre chang loin ka che chhuak nghal a, darkar chanve vel zet ṭhelh tumin ka bei. Ka chet velna lamah hian in chung rangva-ah ka tleng a, vawn tur a awm loh avangin ka tla tlang teuh hle a, a bul hnaia lo awmte ṭe thawm pawh ka hria. Ka ban vei lamah hian min chelhtu an awm niin ka hria a, mahse tumah ka bul hnaiah an awm loh avangin Pathian hnathawh a takin ka chungah a thleng a ni" tiin, a thil tawn chungchang Vanglaini palai a hrilh.

Lalbiaknia (L) leh Zopari te fa panga zinga upa R.Hmingmawia hi kum 2007 khan police-ah a lut a, Bawngkawn SBI-ah hian guard-in a awm mek a ni. A puala inkhawm buatsaih hi Central YMA hruaitute leh media-ten an telpui a ni.