Facebook-in fake account mtd 583 titawp tawh!

Facebook chuan inthen fai hna an thawk mek a, account makta­duai 583 vel zet an titawp niin Thawhlehni khan thuchhuah an siam.

Account tihtawp zinga a tam ber chu mipat hmei­chhiatna rawngkai leh, inhuat­na lam post ṭhin te an ni. Facebook chuan kumin kum tir lam thla thum chhung khan mipat hmeichhiatna lam hawi post maktaduai 21 zet chu an paih tawh tih sawiin, account maktaduai 100 tel tak meuh tihtawp a nih thu an tarlang.

Facebook CEO Mark Zucker­berg chuan, "Kumina ka thupui ber chu Facebook hmangtute dikna leh chanvo humhim sak leh, khawtlang leh ram hmasawnna thlen thei tura hmalakna a ni. Theih tawp kan chhuak mek a, tih tur tam tak kan la nei a ni" a ti.

Facebook hian kumin chhung­in mipat hmeichhiana rawngkai post maktaduai 21 zet an paih tawh a, mimal inhuatna leh insawiselna lam hawi maktaduai 2.5 leh Al Qaida leh ISIS te thlawpna leh rawlrala chetna lam hawia thil post maktaduai hnih chuang zet an paihbo tawh bawk.

Company lam chuan Face­book privacy him tawk lo anga sawi a nih hnu leh, Cambridge Analytica a lar hnuah user-te himna turin theihtawp chhuahin hma an la mek a ni.