WC 2018 khel tur England squad an puang ; Joe Hart leh Jack Wilshere an tel lo

Nimin tlai khan England coach Gareth Southgate chuan 2018 FIFA World Cup khel tur squad a puang a, inelna lian hnuhnung pathuma England no. 1 goalkeeper Joe Hart leh Arsenal midfielder Jack Wilshere te hming a lang tel lo. Liverpool right back Trent Alexander-Arnold chu Three Lions tan vawi khat pawh la inlan lo mah se koh tel a ni a, Chelsea aṭanga Crystal Palace-in an hawh kum 22 mi Ruben Loftus-Cheek pawh England tana vawi khat chauh a la inlan chungin koh tel a ni bawk.

England hi World Cup-ah Belgium, Tunisia leh Panama te nen Group G-ah an awm ho a, an match hmasa ber hi June 18 hian Tunisia nen an khel ang. Russia ram pan hma hian June 2-ah Nigeria nen Wembley Stadium-ah friendly match an khel ang a, June 8-ah Costa Rica nen Elland Road-ah inpuahchahna hnuhnung an nei bawk ang.

Pep-a duh loh Hart
Pep Guardiola-a'n Manchester City a zawm tirhin England leh City number 1 keeper Joe Hart-a'n a duh dana a khelh theih a beisei loh thu a sawi nghal a, English keeper hian khelhna a chan theihna tur zawngin Serie A club Torino-ah loan-in a kal nghal a, tun season-ah West Ham United-ah a kal leh bawk.

City tan Pep-a awm hi malsawmna a nih laiin Joe Hart-a tan erawh mangchhia a ni a, loan-a a khelhna Hammers-ah pawh inkhel bul ṭan a harsat. West Ham boss David Moyes-a'n Joe Hart aiin Adrian a thlang fo a, English keeper hi tun season-ah vawi 19 chauh a inlan. Hei bakah hian goalkeeper beiseiawm Jordan Pickford bakah Jack Butland leh Nick Pope te an awm avangin Southgate tan Joe Hart-a paih a harsa lo.

Par chhuak lo tur Jack?
Jack Wilshere-a'n kum 18 leh ni 222 leka upa nichungin England tan a match hmasa ber a khel tawh a, inhliam vangin Euro 2012-ah a inlan lo a. World Cup 2014-ah ram tana khel tura koh a ni a, group stage an paltlang lo. Euro 2016-ah inhliam vanga league match vawi thum chauh a khel chungin an ko a, beisei a pha lo.

Tun season-ah Wilshere-a'n khelh ṭhat chang nei mah se March thlaa England-in Netherlands leh Italy te nena friendly match an khelh ṭumin inhliam vangin a inhnukdawk a, dinhmun derthawng sa a nih tawh avangin a dinhmun a ṭhat phah lo. England rawlthar beiseiawm ber zinga sawi ṭhin Wilshere hi kum 26 mi a nih tawh avangin ram tan chuan a par chhuak tawh dawn lo niin a lang.

Ngaihnawm dang
Goalkeeper-ah Jordan Pickford chu number 1 tur a nih a rinawm a, Stoke City keeper Jack Butland-a'n a chuh pha ve bawk ang. Burnley keeper Nick Pope hi tun hmaa bawnghnute zuar a ni a, a tan World Cup khelh hi chhinchhiah tlak tak a ni dawn.

Liverpool-in Champions League final an thleng a, Trent Alexander-Arnold atan hun ṭha a inher chhuakah a ngaih theih.Tottenham-in defender pathum an thawh a, Kyle Walker leh Kieran Trippier bakah tun season-a inlan mumal lo Danny Rose te an tel. Chelsea defender Gary Cahill a dinhmun a derthawng anga sawi ni mah se Manchester United defender Phil Jones te nen koh zingah an tel.

Midfield-ah mahni club khelhnaa left back-a khel pahnih Fabian Delph leh Ashley Young te chu an tel a, Ruben Loftus-Cheek-a'n season tawp lama Crystal Palace tana a chet ṭhat a chhawr bawk. Tlarhma lamah thil mak hranpa a awm lo a, Arsenal forward Danny Welbeck tan erawh Raheem Sterling, Jamie Vardy, Harry Kane leh Marcus Rashford te karah khelhna hmun chan a harsa ang.

England Squad
Goalkeepers: Jordan Pickford (Everton), Jack Butland (Stoke), Nick Pope (Burnley)
Defenders: Trent Alexander-Arnold (Liverpool), Kyle Walker, Kieran Trippier, Danny Rose ( Tottenham vek), Harry Maguire (Leicester), Phil Jones (Man Utd), John Stones (Man City), Gary Cahill (Chelsea)
Midfielder: Jordan Henderson (Liverpool), Eric Dier, Dele Alli (Tottenham ve ve), Jesse Lingard, Ashley Young (Man Utd ve ve), Fabian Delph (Man City), Ruben Loftus-Cheek (Chelsea),
Forwards: Raheem Sterling (Man City), Jamie Vardy (Leicester), Harry Kane (Tottenham), Marcus Rashford (Man Utd), Danny Welbeck (Arsenal).
Stand-by: Tom Heaton, James Tarkowski, Lewis Cook, Jake Livemore & Adam Lallana

England Coach
Gareth Southgate THUSAWI:
Player naupang tak an ni hlawm a, heng player uaptu tur tawnhriat nei player an awm a, hei vang hian team-a inrual khai phah khawp ang.
Player thlang chhuak tur hian thla tam kan ngaihtuah a, kar hnih khat leka thlan a ni lo. Team chhungah hmasawnna a awmin ka hria a, hma kan sawn zel kan beisei bawk.