Hlimhlimi'n mini album 'Malsawm Ruahpui' a tichhuak

'Ṭhian rinawm' hmanga Zofate thiam taka min awitu Hlimhlimi chuan nizan dar 7-ah khan a mini album hmasa ber 'Malsawm Ruahpui' a piancham lawmna ni pah fawmin a tichhuak.

'Malsawm Ruahpui' mini album-ah hian hla pali- 'Malsawm Ruahpui', Eng 'Nge Sual Tifai Thei Ang', 'I Ṭap Thawmah I Lalpa A Tho Ta' leh 'Zumthlak Hawi' tihte a dah a ni. Heng hla zinga pahnih hi chu Kristian Hlabu-a mi a ni tih kan hre vek awm a, tin, 'Zumhtlak Hawi' hi 'Ṭhian rinawm' Hakha version a ni thung.

Hlimhlimi chuan he a album thar hi kum hnih chuang lai a buaipui tawh thu Vanglaini a hrilh a,"Track ka duh uluk a, chumi avang chuan a music ho hi uluk taka ka siamtir niin, a ṭhente hi chu kum hnih chuang liam taa ka neih tawhte kha a ni," a ti. HC Recording-ah recoring chu a ti a, a hlaa music-te chu kan hriat ṭhan loh ang deuhin a her danglam deuh tih a sawi bawk.

Kum hnih vel zet chu Hlimhlimi hian ama pual music video a tichhuak tawh loa, mahse nizanah khan a mini album a tihchhuah rualin a album title track 'Malsawm Ruahpui' chu music video a tichhuak nghal a ni.

'Malsawm Ruahpui' mini album-a hlate hi streaming platform hrang hrangah ngaihthlak theihin a dah chhuak a, Spotify, Apple Music leh YouTube mai bakah Tidal, Deezer leh Shazam lamah pawh a dah chhuak a ni.

Hlimhlimi chuan a album-a hlate hi music video la siam vek tura ruahmanna a neih thu a sawi bawk.

Hlimhlimi zai ngainatu tan chuan duh hun hunah a album thara hlate hi ngaihthlak tur a awm reng tawh a, ngaihven thuai chi a ni ngei ang.

Malsawm Ruahpui track list:-
1 Malsawm Ruahpui
2 Zumhtlak Hawi
3 Eng Nge Sual Tifai Thei ang?
4 I Ṭap Thawmah I Lalpa A Tho Ta