Billboard 200 chart-ah ‘Fearless (Taylor’s Version)’ a rawn invawrh leh

14th October, 2021

Billboard 200 chart-ah a tlangzarh kar aṭanga thla ruk vel zet a liam hnuah Taylor Swift-i album ‘Fearless (Taylor’s Version)’ chu pakhatna a rawn ni leh.

‘Fearless (Taylor’s Version)’
Taylor Swift album hi kar hmasa lamah kha chuan chart-ah 157-na daih a ni a, tunkar chart-ah erawh pakhatna a rawn ni daih mai. Billboard 200 chart-ah vawi hnih pakhatna a ni chiah bawk.

‘Fearless (Taylor’s Version)’ hi Taylor Swift hian Autographed CD leh vinyl a tlangzarh thar a, chuvang chuan US-ah chuan kar hmasa chhunga album hit ber a ni leh ta a ni. Taylor-i'n thil thar a tihchhuah tawh hi chuan US mipuite khuan an bawh huam zel a ni ber a, chuvang chuan a CD leh vinyl tlangzarh thar aṭang hian kar hmasa chhung khan Billboard 200 chart-a che ṭha tehna Equivalent album unit a hmu chhuak tam leh viau mai.

October 1 khan CD leh Vinyl hi a tichhuak a, chuta ṭang chuan EAU 1,52,000 hmu chhuakin vinyl hi copy 67,000 zet October 7 thleng khan a hralh a ni. Hei hi MRC Data kum 199-a tihchhuah a nih hnua vinyl album hralh tam palina a ni phak a, hralh tam ber chu a album tho 'Evermore' kha a ni thung.

Billboard 200 chart-a che ṭha dangte chu
Drake 'Certified Lover Boy' chu a zawnin kar hnih chhung pahnihna a ni ta a, Meek Mill album thar 'Expensive Pain' chu pathumna a ni thung.

Kar hmasa lama pakhatna YoungBoy Never Broke Again 'Sincerely, Kentrell' chu palina a ni a, Lil Nas X chuan a album thar ber 'Montero' hmangin top 5 a khar.

Artist 100 chart-ah pawh Swift tho
Taylor Swift hi Billboard Artist 100 chart-ah pawh pakhatna a ni nghal bawk a, kar hmasa lamah khan 16-na niin a rawn invawrh sang hle. He chart-ah hian vawi 49 lai pakhatna a ni ta a, a record lo siam tawh sa, Artist 100 chart topper ni ngun ber record chu a rawn belhchhah leh ta a ni.

Pahnihna chu Drake ni thungin Meek Mill chu pathumna a ni ve bawk.

The Hot 100 lam ve thung
The Kid LAROI & Justin Bieber 'Stay' bawk Hot 100 chart lamah chuan roreltu a ni leh a, Lil Nas X & Jack Harlow 'Industry Baby' chu pahnihna niin, Walker Hayes 'Fancy Like' chu pathumna a ni.