Kum zabi 21-naah UK-a hmeichhe zai an ngaihthlak tam ber P!NK

UK music licensing company PPL chuan kum zabi 21-naa UK mipuite'n hmeichhe zai an play tam ber chu American singer P!nk zai a nih thu an tarlang.

PPL hian UK radio station-te leh TV channel-a zai an play nasat dan aṭangin he data hi an siam a, Adele, Beyonce, Rihanna, Lady Gaga leh Katy Perry-te ai pawhin P!nk zai hi an play nasa zawk niin an tarlang a ni.

Kum 42 mi 'Try' hitmaker hi kum 2000 chho aṭang khan UK-a radio station hrang hrangah an play nasa hle niin PPL chuan a tarlang a, a hla hit zual 'Just Give Me A Reason', 'Try', 'What About Us', 'Sober' leh 'Walk Me Home'-te chu a tlangzarhna rei tawh mah se vawiin thengin UK-ah chuan an la play nasa hle a ni.

Kum 40 vel zet rimawi khawvela thawm nei ring tawh 'Madonna' chuan P!nk hi a dawt a, pahnihna a ni. 'Teenage Dream' hitmaker Katy Perry chu pathumna a ni thung a, Rihanna leh Lady Gaga-te chu palina leh pangana an ni bawk.

UK mi leh sa Adele chu parukna a ni pha ṭawk a, pakuana Little Mix chu UK artist an ni bawk a, anni pahnih chiah hi British act zinga an hla play nasat zual 10-ah an lang phak.

PPL hian zaithiam hming 20 an tarlang a, chung zingah chuan Beyonce, Kylie Minogue, Whitney Houston, Taylor Swift leh Dua Lipa-te pawh an lang a ni.

Kum zabi 21-a UK-a hmeichhe zai an play nasat zual 10-te chu:-
1. Pink
2. Madonna
3. Katy Perry
4. Rihanna
5. Lady Gaga
6. Adele
7. Beyonce
8. Kylie Minogue
9. Little Mix
10. Whitney Houston