EU-in online media platform-te HD pe chhuak lo turin ngen

European Union chuan Nilaini khan online media platform-te chu movie high definition-a movie stream theih lo tura siam turin a ngen a, standard quality-a pe chhuak rih turin a ti.

Tunlai khawvelah web giant- Netflix, Disney+, Hulu, HBO leh Amazon-te chuan ṭan la nasain film entute'n fiah tak a an en theihna turin HD-in an pechhuak nasa hle a, online speed tichakin screen resolution ṭhatna turin hma an la nasa hle a ni.

EU commissioner for the internal market and digital economy, Thierry Breton chuan broadcast file size lian lutukte chuan Web a timuang tih sawiin, mi tam takin coronavirus darh zel vanga in lam aṭanga hna an thawh a ngaih avangin online media platform-te chuan an streaming quality chu an tihhniam a ngai tih a sawi.

Breton chuan  Netflix CEO Reed Hastings nen an inbiak hnuah, "Europe leh khaw­vel pum chuan thil thar an hmachhawn a ni. " Sorkar hrang hrangte chuan Covid-19 darh lohna turin mihring punkhawm an khap a, in lam aṭanga hnathawh emaw online education emaw kalpui an thlawp hle. Streaming platform, telecom operator leh internet hmangtute pawhin hemi kawngah hian mawhphurhna an nei a, internet ṭha taka hmantur a awm theihna atan kawng zawh tur kan nei ṭheuh a ni," a ti.