NETFLIX-a series 'hit' ber - SQUID GAME

Internet khawvel a luah hneh dan ngaihtuahin Netflix series Squid Game chu series entu tam chak ber a nih a rinawm sa a, tunah chuan a chiang ta! Korean Drama 'Squid Game' chu Netflix-a series entu pung chak ber a ni.

South Korean survival drama series 'Squid Game' hi tlangzarh a nih aṭanga ni 28 chhungin chhungkaw maktaduai 111-in an en hman anga chhut a ni a, 'Bridgerton' (mtd 82)-in Netflix series hit ber dinhmun a lo luah tawh chu a rawn nek chhuak.

Squid Game hmaa Netflix series hit ber chu Bridgerton a ni
Netflix hian hetianga data a tihchhuah theihna atan hian series pakhat minute hnih en tling chin an chhiar ṭhin a, Korea, South East Asia, Australia leh New Zealand-a Netflix vice president Minyoung Kim chuan 'Squid Game' chu an beisei phak baka a hlawhtlin thu a sawi chhuak hial!

"Korean series-a kum 2015-a investment kan tih ṭan khan, Asia leh khawvel ram hrang hranga K-fan-te tan world-class story pho chhuah kan duh a. Vawinah erawh, 'Squid Game' hian kan beisei phak bak min thlentir a ni," a ti.

'Squid Game' hi September 17 khan tlangzarh niin episode pakua a awm a, englam hawi series nge tih erawh tarlan nawn a ngai tawh awm lo e.

Lee Jung-jae, Park Hae-soo, Wi Ha-joon, Jung Ho-yeon, O Yeong-su, Heo Sung-tae, Anupam Tripathi, leh Kim Joo-ryoung-te channa series hian lawm a hlawh a, internet lamah pawh 'Squid Game' memes pawh hmuh tur a tam hle. Jung Ho-yeon phei chuan series tlangzarh a nih hnu khan Instagram lamah follower maktaduai 14 a neih belh tawh niin Forbes chuan an tarlang tawh nghe nghe.

'Squid Game' hi tihchhuah a nih hnu lawk khan Netflix pek chhuahna ram 90 laia 'Netflix daily Top 10 list'-ah pakhatna a ni nghal a, tunah chuan series hit tak tak - 'Lupin', 'Money Heist', 'Stranger Things' leh 'The Witcher'-te ai pawhin entu an pung chak tawh zawk a ni.

Netflix-a series entu tam chak zualte chu:-

1 Squid Game mtd 111
2 Bridgerton mtd 82
3 The Witcher Lupin mtd 76
4 Stranger Things Sex/Life mtd 67
5 Money Heist mtd 65

Beng tivarah
Squid Game siamtu Hwang Dong-hyuk chuan kum 2008 khan Squid Game story hi a nei daih tawh a, mahse production company a hmuzo mai lo. Kum 2019 velah khan Netflix nen an inrem ta chauh a ni. Squid Game episode zawng zawng hi ama ziah leh direct vek a ni.