Ram hausate 'carbon emission' a pung chak

Mithiamte'n zirchianna an neih aṭanga a lan dan chuan ram hausa zual 20-te 'carbon emission' (carbon pekchhuah) chu nasa takin a pung.

Climate Transparency Report-in a tarlan dan chuan kumin hian G20 group-te CO2 pekchhuah chu 4% in a pung dawn a, nikum lamah khan hripui vangin 6% laiin tlahniam mah se kuminah hian nasa takin a pung leh a ni.

China, India leh Argentina-te pawhin kum 2019-a an emission level aia tam kumin hian an pe chhuak dawn.

Kar hnih hnu lawkah COP26 climate conference Glasgow-a neih a ni dawn a, heta an thukhel tur pawh hi a khirh dawn hle niin a lang.

G20 groupte chu khawvel puma emission 75% zeta mawhphurtu an ni a, nikum lamah Covid-19 vanga khawvel a inkharkhip avangin nasa takin tlahniam mah se kumin lamah erawh a pung chak leh tawh hle.

Climate Transparency Report hi BBC chuan research organisation leh environmetal campaign pawl 14 lai intelkhawmte tihchhuah a nih thu a tarlang.

G20 group-te chuan kumin hian lungalhthei 5%-in an hmang tam dawn niin an chhut a, hei hi China-in 60% laia a hman tam avang leh US leh India pawhin nasa taka lungalhthei an hman vang a ni.

Climate Transparency Report chuan kum 2015-20 aiin gas pawh 12% laiin hman tam a ni tih a tarlang.

G20 ramte chu:
Argentina, Australia, Brazil, Canada, China, France, Germany, India, Indonesia, Italy, Japan, Republic of Korea, Mexico, Russia, Saudi Arabia, South Africa, Turkey, United Kingdom, United States, leh European Union