Mizoram UPC Gen. PYD-in Covid-19 vangin Live Crusade ṭhulh

Mizoram United Pentecostal Church, General Youth Department Executive Board chuan Ningani khan meeting neiin hetah hian Covid-19 chungchang an ngaihtuah a, Kohhran leh Sorkar thuchhuah siamte chu hripui laka mipui himna tura mipuite zawm zel turin PYD member zawng zawng an ngen.

General PYD-in programme hmachhawp a lo neih tawh zawng zawngte pawh huaihawt rih lo turin thutlukna an siam a, an hruaitute zinchhuah programme hrang hrangte pawh an ṭhulh bawk. April 18-19-a Lawngtlai-a Live Crusade an neih tur pawh an ṭhulh a ni.

Tualchhung leh Bial tin PYD-te chu puipunna lam chi huaihawt lo turin an hriattir a, tualchhung PYD inkhawm leh sumtuaknate erawh tualchhung PYD kutah an dah thung. PYD member-te chu hripui laka kohhranhote an him theihna turin a tam thei ang ber ṭawngṭai turin an ngen bawk a ni.