Royal Wedding-a perform tur Sir Elton John

British lal tupa meuh nupui nei tur chuan khawvel a deng chhuak a, zainthiam inlan tur te pawh a theuneu dawn lo. English singer Sir Elton John chu May 19, Inrinni-a Prince Harry leh Meghan Markle te innneihnaah hian a perform dawn.

Elton John hi Royal Wedding-ah hian a inlan dawn tih thawm a lo awm tawh a, tunah chuan nem ngheh a ni ta a ni. Kum 71 mi lai ni tawh mah se, a ropuina a la dai chuang lo tih a chiang hle a ni.

Royal Wedding-ah hian Elton John hian kum 1973 daih tawha a tihchhuah 'Candle in the Wind' chu a sa dawn nia tarlan a ni. He hla hi Harry-a nu Princess Diana vuinaah pawh khan a lo sa tawh a, kum tam tak liam hnuah a sa leh dawn a ni.

English singer chuan Harry (33) leh Markle (36) te inneiha perform chu a chak tawh thu a sawi uar hle. Elton chuan, "Ka ṭhian ṭha tak Diana khan a fapa nupui nei tur hi hmu ve se a hlimin, a chhuang ngawt ang" tiin, kum 1997-a boral Diana chugchang a sawi chhuak bawk.

British lal chhungkaw tana mi pawimawh tal Elton John hi Prince William leh Duchess Catherine te inneih ṭumin a lo perform tawh bawk.

He tih lai hian Elton John hi St George's Chapel, Windsor Castle-ah nge a zai dawn a, reception-ah tih a la chiang lo thung.

Markle chhungte lam hi
American actress Markle hi a pa Thomas Markle chuan pasal a neih ni hian a ṭawiawm thei dawn lo nia tarlan a ni. Thomas hi tun hnai khan a lung zai a ni a, London a pan ve thei dawn lo. Kum 73 miin a fanu a tawiawm theih dawn leh dawn loh chungchangah hian thu leng vak a tam hle a nih kha.

Hetih lai hian Markle-i nu Doria Ragland chuan London a pan tawh thung. Doria hian Thawhlehni khan Los Angeles chhuahsanin England hi a pan a, Nilaini khan a thleng a ni.