Black Eyed Peas-ah Nicole Scherzinger?

American singer Nicole Scherzinger chu Black Eyed Peas-a Fergie hmun ruak luah tur anga sawi rik a ni mek.

Black Eyed Peas hi an vocalist Fergie chuan nikum khan a chhuahsan a, a thlakna tur an dap mek. Fergie thlak tur hian Nicole Scherzinger hi hming larngsar a ni a, an sawizawm nasa viau bawk.

Band member Will.I.Am chuan, "Nicole hi kan ṭhian hnai tak a ni a, Fergie awm hma pawha kan hmelhriat tawh sa a ni. Amah nen hian kan inbe fo a, thil eng eng emaw kan sawi dun fo a ni" tiin, Nicole chungchang a sawi. Hetih rual hian an band a zawm dawn leh dawn loh a sawi lang lo thung.

Will.i.am hian a bandmate Taboo leh apl.de.ap te pawhin Nicole hi an ngaina hle tih a sawi thung a, hei vang hian a zawm mai rinna a lian hle. Nicole hi fan-te pawhin Black Eyed Peas zawm tur hian an duh a, an nawr ve reng bawk.

Black Eyed Peas hian Fergie awm loh hnuah hla thar pakhat an tichhuak tawh a, kum sarih hnua a vawi khat nan January thla khan 'Street Living' an tichhuak a ni. Nicole hian an band hi a zawm a nih chuan thawm pawh an nei thar leh ngei a rinawm.