BET Award nominee puan a ni ta

Kum 2001 aṭnga sem ṭan BET Award chu June 24 khian sem a ni leh dawn a, nominee pawh puan a ni tawh.

Black Entertainment Televi­sion network chuan music, acting, sport leh entertainment huanga chawimawi phute hnenah award hi a hlan ṭhin a, a lar sawt hle. Nominee zingah hian American record producer DJ Khaled chu mimala langsar ber a ni a, category paruk zetah a lang.

Chung zingah chuan - Album of the Year leh Video of the Year te a tel a, Coca-Cola Viewers' Choice dawng turin a dinhmun a ṭha viau bawk. Kendrick Lamar chu ṭum dang ang bawkin a langsar leh a, award panga dawng thei dinhmunah a ding mek. American hip-hop star hi Khaled nen hian Best Collaboration, Video of the Year, Best Male Hip-Hop Artist, Album of the Year leh Coca-Cola Viewers' Choice category-ah te an awm dun a, vanduai zawk an awm a ṭul dawn.

Nominee zingah hian - Bruno Mars, Drake, Beyonce Knowles, Jay-Z, Cardi B leh Chris Brown te pawh an tel.

Movie lamah chuan kumina film chhuak tawh zinga langsar ber pawl 'Black Panther' a langsar a, Best Movie award dawng thei turin chhawpchhuah a ni.

Infiamna lamah chuan - Williams te unau Serena leh Venus te chu Sportswoman of the Year dawng thei turin an dinhmun a ṭha viau a, Basketball star Stephen Curry, LeBron James leh Kevin Durant te chuan Sporstman of the Year award an inchuh dawn thung.

BET Award 2018 hi Microsoft Theater, Los Angeles-ah sem a ni dawn a, live-a pekchhuah a ni ang.