Royal Wedding ; Prince Harry & Meghan Markle Ropuina ni a her chhuak ta

British lal tupa Prince Harry leh Amrican actress Meghan Markle te chu vawiin chhun dar 12:00 hian, St George's Chapel, Windsor Castle, Windsor, United Kingdom-ah an inkutsuih dawn ta. He hunah hian Prince William chu a unaupa 'Best'-ah a ṭang dawn a, Prince Harry bulah a ding dawn a ni.

Kensington Palace chuan Harry leh Markle te hian wedding rehearsal pawh an nei tawh tih sawiin, ruahmanna engkim peih fel a nih tawh thu an tarlang.

Hunserh hi dar 12:00-ah ṭan ani dawn a, India sana-ah chuan tlai dar 4:40 vel a ni ang. Inneih hmang tur hian sawm bikte pawhin London an pan khawm tawh a, mi pawimawh tak tak an inpel suau suau dawn!

St George's Chapel-a hun hman zawh a nih hnu hian reception a awm dawn a, sawm bik zingah pawh zanriah kilpui tur bik an la awm cheu dawn a ni.

An ineihna tur Windsor-ah chuan fan eng emaw zat chu Ningani aṭang tawh khan an riak lut tawh a, a hmunah an inkulh hmiah! Harry leh Markle te inneih chhim tum hi an ṭhehnem em avangin venhimna pawh khauh tak a kenkawh a ni.

Sawmbik te
Royal Wed­ding-a tel tur hian sawm bik mi 2,640 zet an awm a, mi pawimawh leh chal lang tak tak an kat nuk dawn. Sawm bik zingah hian vanduaina tawh avanga ramtuileiloa awm zui ta Philip Gillespie pawh a tel. Ani hi Afghanistan-a bomb puaka a ke pakhat chan a ni a, charity foundation aiawh an tel nual dawn bawk.

Sawm bik zingah hian India chhulchhuak Pryanka Chopra pawh a tel a, a ni hi Markle-i ṭhian hnai tak a ni. Spice Girls member te pawh sawm an ni a, anni bakah hian mi lar tak tak an fuankhawm dawn. Elton John chu a perform dawn tih a chiang tawh bawk.

Ram hruaitu zingah UK Prime Minister Theresa May leh Pre­sident Donald Trump te chu tel tura beisei an ni.

Venhimna lam
Buaina leh harsatna a thlen loh nan venhimna khauh taka kenkawh a ni dawn a, sipai pawh ṭhahnem tak an duty dawn. Sniper-te chuan building sang tak aṭangin mipui che vel an thli tlai dawn a, a huna silai hmet puak mai thei tura inralrin tir an ni. Police-te chu hmun hrang hrangah an patrol dawn a, boruak leh lei lam aṭanga harsatna thleng thei uluk taka ven a ni dawn.

Media-te chuan venhimna khauh taka kenkawh a nih theih nan hian $mtd 30 vel zet sum ruahman a nih thu an tarlang. Royal Wedding-a senso tur zawng zawng hi $tld 1.4 vel zet a nih rin a ni.

Markle family
America aṭangin Markle family-te'n London an pankhawm tawh a, chung zingah chuan Markle-i pa Thomas Markle a tel lo thung. Thomas hi a lung zai a nih avangin a tel ve thei lo. Hetih lai hian a nupui Doria Ragland chuan London a thleng tawh a, Queen Elizabeth nen inkawmna hun pawh an nei tawh.

Doria hian Prince William, Kate, Prince George leh Princess Charlotte te pawh Ninagni khan Windsor Castle-ah a lo kawm tawh a ni. Hemi hma pawh hian Prince Charles leh a nupui Camilla te chu a lo hmu tawh bawk.