Coldplay 'Music of the Spheres' a chhuak ta; Boruak tibawlhhlawh lo zawngin tour dawn

Coldplay chuan an studio album pakuana, an fan-te pawhin an nghahhleh em em 'Music of the Spheres' chu nimin khan an tlangzarh ta.

Chris Martin leh a ṭhiante hian UK lamah Parlophone kaltlangin an album thar hi an tlangzarh a, US lamah erawh Atlantic Records kaltlangin an tlangzarh thung.

'Music of the Spheres' album hi streaming platform hrang hrangah ngaihthlak tur a awm nghal a, single-a an tihchhuah tawh pahnih 'Higher Power' leh BTS an thawhpuina 'My Universe' telin hla 12 a awm a, Japanese edition-ah bonus track pahnih an dah tel bawk.

An album tharah hian BTS bakah Selena Gomez, We Are King leh Jacob Collier-te pawh an thawhpui a ni.

Album pathum chiah an siam belh tawh dawn?
Chris Martin chuan 'Music of the Spheres' bakah hian album pathum chiah siam belh an tum tawh tih a sawi a, studio album 12 an tihchhuah hnuah chuan album dang siam an tum tawh lo niin a sawi!

Retire tawp a sawina erawh a ni loa, Martin chuan live show erawh kum 70 chuang an nih thlenga neih chhunzawm zel a duh thu a sawi tel a ni.

Boruak tibawlhhlawh lo zawngin tour dawn
British rock band Coldplay chuan nakkum lama an album thar 'Music of the Spheres' World Tour an neih hunah khawvel boruak tibawlhhlawh lo zawngin tour buatsaih an tum.

Hman deuh khan Coldplay hian boruak tibawlhhlawh lo zawnga tour dan tur a awm a nih loh chuan tour neih an tum tawh loh thu an lo sawi tawh a, an thusawiah hian nghet taka din an tum a; nakkum lamah chuan boruak bawlhhlawh siam lo thei ang berin hmun hrang hrangah concert an tum a ni.

Ruahmanna an siam danah chuan ṭum danga an live show neih ṭhin aia 50% a 'emission' tihthlem an tum a, an concert-na tur hmun zawng zawng chu hetiang tur hian an buatsaih ang.

Chris Martin, Jonny Buckland, Guy Berryman, Will Champion, leh Phil Harvey-te chuan thuchhuah siamin,"Khawvelin sik leh sa inthlak danglam nasat vanga harsatna nasa tak a hmachhawn hi kan la thutak hle a, chumi avang chuan kum hnih liam ta chhung khan environmental expert hrang hrang rawnin boruak tibawlhhlawh lo thei ang bera tour buatsaih dan tur kan zawng a ni.

"Engkim chu duhthusam ang thlapin a tih theih dawn loh a, mahse kan hriat ang angte chu midang pawh hrilh ve kan tum. Hna kal lai mek a ni a, ṭanpuina kan dawn zawng zawng avang pawhin kan lawm hle," tiin an sawi.

Nakkum March 18 hian Costa Rica-ah 'Music of the Spheres' World Tour chu an ṭan dawn a, chumi zawhah chuan Dominican Republic, Mexico, USA, Germany, Poland, France, Belgium leh U.K-te an pan leh ang.

'Fix You' hitmaker hian an sum hmuh chhuah aṭanga 10% chu 'Imperial College London Grantham Institute - Climate Change and the Environment' a climate change expert an thawhpuite hnenah an pe dawn bawk a ni.

'Music of the Spheres'-a hla awm te:-
1. "Music of the Spheres"
2. "Higher Power"
3. "Humankind"
4. "Alien Choir"
5. "Let Somebody Go" (with Selena Gomez)
6. "Human Heart" (with We Are King and Jacob Collier)
7. "People of the Pride"
8. "Biutyful"
9. "Music of the Spheres II"
10. "My Universe" (with BTS)
11. "Infinity Sign"
12. "Coloratura"