Hranghlui zaithiam Lalthannguri Tochhawng a liam ta

Mizo hranghlui zaithiam, Zofate zinga hming dai tawh lo tur Lalthannguri Tochhawng (K-64) chu nimin chawhnu dar 1:50 khan ZMC-ah a boral. Nizan khan lumen a ni a, vawiinah vui a ni ang.

Kum 1958, February 28-ah Sihfa khuaah a piang a, kum 1967-ah Aizawl Ramhlun South-ah an pem. Kum 1981, January 13 khan Upa R. Lalmalsawma Mission veng nen an innei a ni.

Lalthannguri Tochhawng hian kum 1977 aṭang khan Radio-ah hla a record ṭan a, hla 120 chuang a record hman.

Pathian fakna hla lam hlir a sa a, "Tui nung min pe rawh," tih hla chu a rawn lâr chhohpui hmasak ber niin, "Tui nung min pe rawh, Kross-ah chauh, Khawvelah hian mikhual ka ni, Lâwmna tûr hlir a lo ni si, Ṭawngṭai ngaithlatu Lalpa, Bethlehem i pan ang, Ram thianghlima Lal lo piang chu" tih te leh "Rorêlna" tih hla te hi a lârpui zual ṭhenkhatte an ni.

Pathian rawngbâwlin Z.E.F. Zaipawlah telin ram pawn lamah pawh zaia rawngbawlin a zin tawh a, Aizawl veng hrang hrang leh, Zoram hmun hrang hrangah rawngbawl pahin a zai kual nasa hle a ni.