DC FanDome 2021 - The Batman, Flash leh Black Adam Teaser thar hmuh tur a awm ta

DC-in kumtina a buatsaih ṭhin DC FanDome chu Inrinni zanah khan virtual-a buatsaih a ni leh ta a, DC film hrang hrang leh an game-te bakah an series leh animation lam thlengin thil thar hrang hrang hmuh tur a awm.

Matt Reeves-a film direct 'The Batman' trailer thar hmuh tur a awm a, chu chu mi ngaihven ber pawl pawh a ni. Chu bakah chuan Ezra Miller 'The Flash' teaser leh John Cena 'Peacemaker' teaser-te chu ngaihven hlawh a ni bawk. Dwayne Johnson 'Black Adam' ruangam chiang zawka hmuh tur a awm a, a chanpui turte pawh an inlan bawk a ni.

TV series lamah chuan The Flash season 8, Batwoman season 3, Superman & Lois season 2, leh Sweet Tooth season 2-te thlir thuak tur a awma, gamer-te ngaihven 'Gotham Knight' leh 'Suicide Squad: Kill the Justice League' pawh tlem hmuh tur a awm.

Animation lamah chuan Harley Quinn season 3-te, Young Justice: Phantoms trailer te leh Catwoman: Hunted trailer-te pawh hmuh tur a awm a, heng bakah hian DC Universe-a thil hrang hrang hmuh tur a tam hle.

Ngaihven hlawh zual 'The Batman' trailer
Nikum lam DC FanDome-ah khan Robert Pattinson-a channa 'The Batman' teaser hmasa ber chu pholanin a lo awm tawh a, kuminah erawh chiang zawkin a ruangam a hmuh theih ta.

Zoe Kravitz 'Catwoman' pawhin role pawimawh tak a chelh dawn tih a chiang a, The Riddler bakah Colin Farrell 'Oswald Cobblepot' hmelhmang pawh chiang taka hmuh tur a awm tawh a ni. He film hi nakkum March 4-ah an tlangzarh ang.

The Flash, Black Adam leh a dangte
The Flash film-a Ezra Miller-a inthuam dan tur chiang zawkin tihlan a ni a, Michael Keaton 'Batman' ni ngeia hriat a lan thuak bakah Sasha Calle 'Supergirl' pawh a lang thuak. He film hi nakkum November 4-a tlangzarh tur a ni.

Black Adam-in ngaihven a hlawh a, a hmuhnawm dawn tih a chiang. Dwayne Johnson-a 'Black Adam'-in tharum a thawh hreh dawn lo tih a chiang hle. Noah Centineo (Atom Smasher), Pierce Brosnan (Dr Fate), Aldis Hodge (Hawk Man) leh Sara Shahi (Isis)-te pawhin Inrinni zan DC FanDome-ah introduction an nei ṭheuh bawk.

John Cena 'Peacemaker' trailer hmasa ber hmuh tur a awm bawk a, a film a 'light' dawn viau niin a lang.

'Aquaman and the Lost Kingdom' leh 'Shazam: Fury of the Gods' behind the scene hmuh tur a awm bawk a, DC fan-te tan chuan nakkum lam a nghahhlelhawm tawh viau dawn tih a chiang.