'Halloween Kills'-in 'No Time to Die' a dahṭha

Film Industry hmunpui North America Box Office-ah American slasher film 'Halloween Kills' chu sum lalut tam ber a ni a, 'No Time to Die' leh 'Venom 2' ai pawhin sum a lalut tam zawk.

'Halloween Kills' a inhrosa
Jamie Lee Curtis leh Judy Greer-te channa 'Halloween Kills' hi kum 2018-a tihchhuah 'Halloween' chhunzawmna kha a ni a, Holloween franchise-a film 12-na a ni tawh bawk.

Zirtawpni liam ta khan US-ah tlangzarh a ni a, $maktaduai 20 vel senga an siam niin tun kar tawp liam ta chhung khan theatre 3,705 aṭangin $49,404,980 lai a hmu chhuak a, Box Office-a sum lalut tam ber a ni.

'No Time to Die' leh 'Venom: Let There Be Carnage' aiin theatre-ah an chhuah tlem zawk a, chuti chung chuan heng film lian pahnih ai hian sum a lalut tam zawk. Ram dang aṭanga a sum lakluh $5,423,000 nena belhkhawm phei chuan $54,827,980 lai a lalut der tawh.

Film review-tute'n he film chungchanga an ngaihdan hi a inang loa, Rotten Tomatoes lamah chuan mi 151 review aṭangin rating 5.1/10 a hmu a ni.

Nakkum tun ang hun velah hian a chhunzawmna 'Halloween Ends' chu tihchhuah leh an tum bawk a ni.

No Time to Die leh Venom 2
Kar hmasa lama sum lalut tam ber James Bond film 25-na 'No Time to Die' chuan $23,792,118 lai sum a lalut leh a, pahnihna a ni. He film hian ram hrang hrang aṭangin $447,675,672 lai sum a lalut tawh thung a, kumin chhunga film hlawhtling ber pawl a ni der tawh.

Pathumna chu 'Venom: Let There Be Carnage' kha a ni a, $16,501,406 lalut lehin he film pawh hian $283,679,076 a lalut tling tawh.

'The Addams Family 2' chu palina ni ve bawkin $7,064,531 a lalut a ni.

Beisei phak lo 'The Last Duel'
Matt Damon leg Ben Affleck-te channa 'The Last Duel' pawh Zirtawpni khan tlangzarh a ni a, $mtd 100 lai senga an siam film hian $4,759,151 chiah a lalut a, ram dang aṭanga a sum lakluh nen $8,959,151 chiah a la lalut.

Film review-tu lamin fak viau mah se sum lakluh kawngah erawh beisei a pha lo hle. Rotten tomatoes lama rating 7.4/10 lai hmu chungin theatre 3,065 aṭangin $4,759,151 chiah sum a lalut a ni.

Film thar
Chart-a pasarihna 'Honsla Rakh' leh 10-na 'Most Eligible Bachelor'-te chu film thar an ni a, Monster Family 2 (18), Bergman Island (19), Hard Luck Love Song (21), Introducing, Selma Blair (31) leh Luzzu (32)-te chu film thar an ni bawk.